Roma 12:3-13

³Na mdà di kafye blé Dwata di do, ani man-gu di kdeeyu. Nangyu fandam ku mdatah gamu di glut kagkahyu, bay fdanàyu kafdamyu i ktoyu glalò di kalbong i kaftoo blé Dwata di gamu.

⁴I laweh, dee alelan, na sahal nimò i kat satu.

⁵Na lê salngad ayé i gito kagkah. Balù ku dee ato, lo satu laweh guglamto di ksasatuto ku Krayst, na kat satu di gito nun alel di dademe.

⁶Taman, gtento gnamit i sahal gnagan blé Dwata mdà di kafyen di gito. Ku yé gnagan blé Dwata di gito tmugad i ta fgadè Dwata, nimòto ani glalò di kaftooto.

⁷Ku yé gnagan blé Dwata di gito tmabeng, bléto i ktoto di ktabeng. Ku yé gnaganto tamdò, bléto i ktoto di katdò.

⁸Ku yé gnagan blé Dwata gito tamgal nawa i dademe, tooto blé i ktoto déé. Ku yé gnagan blé Dwata di gito mlé, fye ku mdà di klaan nawa i kabléto. Ku yé gnagan blé Dwata di gito mebe, fandufto i kebeto. Ku yé gnagan blé Dwata di gito kamdo, too ato flehew di kimòto dun.

⁹Tooyu fdà di nawayu i kasakdoyu. Knagolyu i sasè, na lalòyu i fye.

¹⁰Too gamu salbong nawa du ta saflanek gamu di ku Krayst, na too gamu safè.

¹¹Falgad gamu, na nang gamu falweh. Finityu nawayu mimò fye di Amuto.

¹²Too gamu flehew du nun fandenyu. Fantahàyu i nawayu di dad kaflayam gafat di gamu, na too gamu fduf dmasal.

¹³Numunyu i dad to ftoo mnè di klandè, na nafèyu i dad to magu slob di gumnèyu.