9 Keu mewö eraum möta mi denöwö jim teköbinak? Juda neŋön kantri tosatŋi eŋgoŋgita Anutugö jeŋe diŋdiŋi akzin me qahö? Saumbaŋ! Miaŋgö keuŋi lök qeljiŋe kewö jim köhöinin: Juda me kantri tosatŋi akinak, nini körekmakörek siŋgisöndok ahinga köpeim neŋgiiga maljin. Miaŋgöra silenini memba öŋgöbingö osimakzin.
10 Miaŋgö keuŋi mi Buŋa Kimbinöŋ kewö ohoget ahöza, “Kunŋan kun solanŋi diŋdiŋi qahö kötökŋi akza.
11 Kungö uruŋe mötmöt qahö ahum kutui laŋ malje. Kunŋan kun Anutu miwikŋaimamgö qahö kapaŋ kölakza.
12 Qahöpmö, körekŋan mönö köna oŋgita jaŋjuŋ aka malje. Körekmakörekŋan mönö böliba Anutugö jeŋe aŋgöjörakŋinambuk akze. Ölöpŋi ahakzawi, mohot-töwa kun mi qahöpmahöp miwikŋaizal.
13 Nesilamŋinan isimkakalek ahakze. Jöl ginaginaŋinan qaksirigö löm ewö aŋaŋiba kiniga kömupkö qösösökŋi ewö miaŋön ambazip laŋ ayuhum eŋgimakze. Keu bölöŋi mi qatögö jitŋi möröm warabe ewö numbuŋine kokolak qeba ahöiga jitŋinan ambazip laŋ eŋgöhömakze.
14 Sait keu kömbukŋambuknöŋ mönö numbuŋini kokolak qeiga ambazip laŋ qesuahöm eŋgimakze.
15 Ambazip laŋ eŋguba sepŋini mokomegöra könaŋinan kik-kek ösumok anda kamakze.
16 Könaŋini goŋgii maljeaŋgö aiwesökŋini kewö akza: Denike lilikömakzei, miaŋgöreŋ mönö köndeŋ-möndeŋ aketka ambazip uruŋinan böliba kömbuhi-makza.
17 Luainöŋ malmalgö könaŋi mi qahö möt kutum yaköze.
18 Anutu göda qebingö keuŋi mi uruŋine qahö ahöza. Jitŋi oŋgitpinbuköra keŋgötŋini qahö möta önewat laŋ malje.” Anutugöreŋ keu mewö ahöza.
19 Anutunöŋ Köna keu kewögöra neŋgiyök, mi mötzin: Köna keu pakpak miaŋön gölme dop jöhöm neŋgimakza. Nini keu miaŋgö bapŋe anda tem köla malinga dop kölma. Qahö tem kölbin ewö, Anutunöŋ mönö likepŋi meleŋ neŋgii ayuhubin. Miaŋgöra sömbunini möta möndömöndönini mosöta keu bök mala tem köl waŋgiinga dop kölma. Anutunöŋ ambazip könanini mewö indelöha ahöza.
20 Köna keunöŋ jöhöm neŋgimakzapmö, nini lökŋanök mi wuataŋgöbingö osimakzin. Anutugöreŋ Köna keunöŋ siŋgisöndok qiwikŋaiiga aukŋe eka ölöp möt kutubinmö, köna miaŋön Anutugö jeŋe solanŋi akingö osibin. Mewö.
21 Naninak osimakzinmö, Anutunöŋ Köna keu wuataŋgöba solanŋi akingöra mi qahö jiyökmö, köna murutŋi kewö areŋgöba jii ahöza: Anutunöŋ nanŋak keunini jim teköiga yaŋgö jeŋe solanibin. Anutunöŋ keu mi Moses aka kezapqetok ambazip yeŋgöra indeliga naŋgöba jiba Buŋa Kimbinöŋ ohogetka nalö kewöŋe aukŋe asuhuiga mötzin.
22 Miaŋgöra denike denike neŋön Jisös Kraist möt narizini, Anutunöŋ mönö körek neŋgö keunini jim teköiga solanibin. Ambazip kambu murutŋi murutŋi neŋön Anutugö jeŋe öröröŋ akzin.
23 Ambazip körek neŋön siŋgisöndok aka Anutugö asakmararaŋaŋgöra osizin.
24 Mi osizinmö, Anutugö kalem möriamŋan asuhuiga Kraist Jisösnöŋ sohopnini meyök. Anutunöŋ kalem miaŋgöra aka keunini jim teköiga solanibin.
25 Mutuk siŋgisöndok aka malgeri, Anutunöŋ mi möta mökösöŋda likepŋi zilaŋ qahö meleŋ eŋgiyök. Mi qahö meleŋ eŋgiba nanŋi ahakmeme solanŋan aukŋe asuhumapköra möta Kraist Jisös jöwöwöl sömbup ewö aliga qeget kömuiga Anutugö jeŋe köl könjörat neŋgimapkö könaŋa ahök. Sepŋi mokoyöhi, mi möt nariinga mewö miaŋön siŋgisöndoknini mosöri solanibin.
26 Könaŋi mi nalö kewöŋe aukŋe asuhumapköra möta Jisös mewö ak waŋgiyök. Anutugö ahakmeme solanŋi mi kewö: Nanŋak solanŋi akza aka kunŋan Jisös möt narizawi, mönö yaŋgö keuŋi jim teköiga solanimakza.
27 Mewö aiga mönö wanigöra silenini mem öŋgöbinak? Yuai kungöra aka qahöpmahöp. Köna keu wuataŋgöba solanŋi akingöra mi osizin. Mewö solanŋi qahö akinmö, Jisös möt nariinga Anutunöŋ neŋgeka keunini jim teköiga solanimakin.
28 Keu ki jim teköba kötŋi kewö jim köhöizin: Köna keu wuataŋgömakzinaŋgöra qahöpmö, Jisös möt narim waŋgizinaŋgöra aka Anutunöŋ keunini jim teköiga solanimakin.
29 Anutunöŋ Juda neŋgö Anutuninanök qahö akza. Mönö kantri tosatŋi yeŋgö Anutuŋina mewöyök akza me qahö? Mönö yeŋgö Anutuŋina mohot akza.
30 Anutunöŋ mohot akza. Miaŋgöra silenini yandiget maljini, neŋön möt narim waŋgiinga mem solanim neŋgimakza aka sileŋini qahö yandiget maljei, mi mewöyök möt narim waŋgigeraŋgöra aka mem solanim eŋgimakza.
