Rom 8:5-27

⁵E huriki ri muri mai a ningaru hale na kakaine ria, ri luhoi kunana a vilo hale i ngaru a kakaine ria. Pali e huriki ri muri mai a ningaru na Hanuna Vure, ri luhoi kunana a ningaru na Hanuna Vure.

⁶E huriki ri luhoi kunana a ningaru hale na kakaine ria bara ri vurua. Pali e huriki ri luhoi kunana a ningaru na Hanuna Vure bara ri bole a nimahuri vakaroro, ri made na nivalemu.

⁷A ta maea, a vuhuna e huriki ri luhoi kunana a ningaru hale na kakaine ria, ri marikoi a Vure, a vuhuna i uka ma ri longototo a vinara vona. Ri keri ni longototo.

⁸E huriki ri ramai kunana a ningaru hale na kakaine ria, a Vure i uka ma i vivi ne ria.

⁹Pali hita, i uka ma si ramai a ningaru hale na kakaine hita. Si ramai a ningaru na Hanuna Vure. I muholi, a Hanuna Vure i made pololilo ne hita. E rei a viri, a Hanune Kristo i uka ma i made pololilo vona, i uka ma ia a tara ne Kristo.

¹⁰Si rata pali a naro hale. I mavonga, a kakaine hita bara i mate. Pali a hanune hita bara i mahuri vakaroro, a vuhuna e Kristo i made pololilo ne hita, i rata hita si malamala na matana Vure.

¹¹A Hanuna Vure i vakamahuri mulea e Isu Kristo. Hita ranga, na tahuna a Hanuna Vure i made pololilo ne hita, a Vure bara i vakamahuri mule hita na matenga. A Hanuna Vure, ra i made pololilo ne hita, ge ratea a naro iea.

¹²I mavonga, o huriki a turagu, nahea si gi muri mai a ningaru hale na kakaine hita.

¹³E huriki ri muri mai a ningaru hale na kakaine ria bara ri mate. Pali e huriki ri lobo ni ramai a ningaru hale na kakaine ria na nitora na Hanu Kiripiripi, bara ri bole a nimahuri vakaroro.

¹⁴E huriki ri muri mai a Hanuna Vure, ria kunana a tuna Vure.

¹⁵A ta mavonga, a vuhuna a Hanuna Vure i uka ma i rata hita si gi vora tabu na naro hale, si gi mangenge. I rata hita, re hita e huriki a tuna Vure, si gi gale maea, “Tata! O tata!”

¹⁶A Hanuna Vure i vakasiri, si ta muholi na tahuna si taki hita, hita e huriki a tuna Vure.

¹⁷Ngane hita e huriki a tuna Vure. I mavonga, bara si bole turane Kristo a bagetua a Vure i ru puru ne huriki e tuna. Ngane si bole a nimadihi turane Kristo, i mavonga muri ma bara si bole a bagetua turane Kristo.

¹⁸I muholi hateka, a maka nimadihi si hataki ngane a maki tavula, a vuhuna a bagetua bara si bole muri ma, i dagi hateka.

¹⁹A maki lobo a Vure i ratarike ri dava, ri pasimata vona a parava a Vure ge vakasiri kavakava, ne rei e huriki e tuna muholi.

²⁰A vuhuna a maki lobo a Vure i ratarike na limana, ri bele hale hateka. I uka ma ri bele hale na ningaru ne ria. I bele mavonga na ningaru na Vure. Pali muri ma a Vure bara i rata kamumu hateka a maki nga. I mavonga ri pasimata vona.

²¹Muri ma a maki nga ri gi matukapaga na naro ni matutu, ri gi bole a bagetua turana e huriki a tuna Vure.

²²Si lohoka vona a maki lobo a Vure i ratarike ri tabana ni bole a nimadihi, ri dedo i manga a ngatavine i pahea a koma, i valai i harena mona.

²³A Vure i habi ne hita a Hanu Kiripiripi, i vakasiri a Vure i korimule hita. I mavonga, hita ranga, si dedo a vuhuna si dava, si pasimata vona a parava a Vure ge pau hita, ge habi ne hita a kakaine hita karaba.

²⁴Na tahuna a Vure i korimule hita, si vakatubu ni pasimata vona. A maki i bele pali, i uka ma si gi pasimata vona.

²⁵Pali a maki i uka ma i bele ma, bara si pasimata vona, si hatenono.

²⁶A Hanu Kiripiripi tara, i tuhori hita, a vuhuna i uka ma si kinigao. I uka ma si lohoka vona si gi vasileki navai, lakea a Hanu Kiripiripi kunana i vasileki na murine hita. Na tahuna i vasileki, i dedo, a pelegona si keri ni tuvevea na nitana bakovi na malala.

²⁷A Vure i lohoka na hatene hita, i lohoka na ningaru na Hanu Kiripiripi, a vuhuna a Hanu Kiripiripi i vasileki ne huriki a tara na Vure, i ramai a ningaru na Vure.