5 Det ra det mur a sakino nemnem ina pinindet, a nuknukin det kai i kis kut un asau ra a sakino nemnem ina pinindet i nemi. Ikut, det ra det mur a nemnem anun a Tokodos na Nion, a nuknukin det i kis un asau ra a Nion i nemi.
6 Osi ra a nuknukino i kis utuntudu ina sakino nemnem ina pinino, in mat. Ikut, osi ra a nuknukino i kis utuntudu ina Tokodos na Nion, in laun ma in taramo a malmal.
7 Osi ra a nuknukino i kis utuntudu ina sakino nemnem ina pinino, der ebar nam o God. Uni osi ra a nuknukino i lenra, ke unatino pasi utuntudu ina kum Warkurai anun o God, ma ken pet lar pasi.
8 Ma det ra det kis utuntudu ina sakino nemnem ina pinindet, ka det in ugasgas lar pas o God.
9 Ikut mot, ka mot kis mo utuntudu ina sakino nemnem ina pinimot. Awu! Mot kis utuntudu ina Tokodos na Nion, uni a Nion o God i laun un mot. Ikut, ra taio, a Nion o Karisito ke laun uni, i awu sur anun o Karisito.
10 Ra o Karisito i laun un mot, a pinimot in mat, kibino una sakino petutna, ikut a niomot in laun, uni mot tokodos umatano.
11 A Nion o God, ra i ukatutur pas o Iesu gusun a minat, i laun un mot. Una pinapam anun a Niono ra i laun un mot, i ra i ukatutur pas o Karisito gusun a minat, in pitar a nilaun una pinimot, ra i ser mat.
12 I mo ra a kum tistising, dat a kum tene pinapam. Ikut awu sur dat a kum tene pinapam tagun a sakino nemnem ina pinindat, sur dat in muri, awu.
13 Uni ra mot mur a sakino nemnem ina pinimot, mot in mat. Ikut, ra una dekdekin a Tokodos na Nion, mot in um doko ru a kum sakino petutna ra a pinimot i ser pami, mot in laun.
14 Uni det ra a Nion o God i mugu det, det a kum nutnutun o God.
15 Uni a Nion, ra mot los pasi, awu sur a ngas na nion ra i pam mot sur mot in tene ititula melet mo anun a nginara, awu. Mot los pas a Nion sur mot a kum nutnutun o God, ra i ras pas mot. Ma una dekdekin a Nion, dat ser kakabo torom o God lena, “Aba, Tita.”
16 Ma a Tokodos na Nion i wasiso puaso una niondat lena dat a kum nutnutun o God.
17 Ra dat a kum nutnutunu, dat in rakon a kum utna anun o God, tomo nam o Karisito. Ra dat in taramo a mamaut tomo nam o Karisito, numur dat in kis tomo nami una nun a minamar.
18 A tasmani lena, a minamar ra o God in pitari tandat numur, in labo sakit taun a kum mamaut ra uniri dat taramo i.
19 A kudulano ukukis rop i kis langlang nama labino nemnem sur a bung ra o God in upuaso ru a kum nutnutunu.
20 Uni a kum ukukis rop det kis una karabus na minat ma det utna oros kut. Awu sur a nemnem anun a kum ukukis, a nuknukin o God sur det in kis langlang sur a bung,
21 ra in palos det gusun a karabus na mereseng na minat. Det in kis langolango una minamar tomo nama kum nutnutunu.
22 Dat tasmani lena, tuk uniri a kudulano ukukis det kis langlang nama tinangis, elar nama ino ra i leser nama ngunungut sur in usus.
23 Ma awu sur a kum ukukis kut, dat kai, ra o God i sa pitar tar a mugano etabor torom dat, a Tokodos na Nion, dat kai dat kis langlang nama tinangis nin ubalandat, nama labino nemnem sur a du bung ra o God in ras dat sur dat a kum nutnutunu, ma in ulangolango a pinindat.
24 O God i sa ulaun pas dat, ma uniri dat kis langlang nama nurnur sur a ngas na nilaun ra in pitari torom dat numur. Ra taio in kis langlang sur tu utna, ikut ra i sa los pasi, ken kis langlang melet mo suri. Osi melet mo in kis langlang sur tu utna ra i sa los pasi?
