17 Tama tibaso megi eno koneani, te ena digi eno te dwai sę me ebo meni. Menio. Te ena tomode bidibo dwai sę ilibo homu kolesaga agai naga te sę ebo dao.
18 Eno koneani, ena tomode te wiegi yai nai deli me bidibo menio. Eno tǫde bidibo tigide me te homude me, te side te wiegi yai nai me deli bidibo menio. Mu tama, eno wiegi yai kolesaga yabo homu ebo, tiali goli eno te kolesaga yabo usu me ebeo.
19 Awe, te wiegi yai kolesaga eno yainogo homu ebadi goli, te kolesaga eno me ebo meni. Me ma, eno ebo hagela homu yali dwai kolesaga, te kolesaga eno ebo dao.
20 Tiali goli eno ebo hagela homu ebo dwai kolesaga eno yaligo da, teda ena digi eno te dwai sę ebo menio. Eno te sę yao homu ebeo. Menio. Te ena tomode bidibo dwai sę ilibo homu kolesaga agai naga te dwai sę ilibo dao.
21 Tama tibaso, enade te tiwai kolesaga bidibo eno sulama konebao: eno wiegi yai kolesaga yabo homu ebaso da, teda te eno homude elalubo dwai sę ebo kolesagago te homu aiyaba elalubo dao.
22 Mu tama, eno homude eno Godigo bomai po mu godolo ebo dao.
23 Tiali goli eno subao, gasa bomai po te eno tigi tomode elalubao, te gasa bomai pogo eno tigi tonalubo dao. Tama te gasa bomai pogo te eno Godigo bomai po mu godolo ebo homu dali hwįbo dao. Tama te gasa bomai pogo ena te ena tomode bidibo dwai sę ilibo homu kolesaga wali pomainogo ilibo dao.
24 Ena da te hobedagia bidibo bidi mu dao. Dego ena te eno tigigo yainogo ebo kolesaga dagala sągowe?
