Rom 7:16-25

¹⁶Pa leba miruo tavukup ganam la tume kikis migat meba makosartang,

¹⁷Tie, irie la tale turuo la akosartung iruo tavuk ila kire. Pa kirinim it. Urie, kirinim la iot na dalap tuo la irano na ula kiro, ga akosartung tavuk ila kire. Are ratmat ga a iruo tavuk la ovaikong maimai ang Moses la mumuru.

¹⁸Terit la karuk a paga ba ila muri la ut na dalap tuo. Tiestung it maime dalap tuo mila tatalim. Migat, narung meba akosartang it tavuk ila mumuri, pa tale puorung meba akosartang.

¹⁹Are gat to, tale akosartung tavuk ila mumuri la narung meba akosartang. Karuk. Pa tavuk ila kire la tale narung meba akosartang, iriet la tume akosar.

²⁰Tie, tume akosar tavuk la tale narung aime, pa tale turuo kan la akosartung iruo. Karuk. Pa kirinim. Urie, kirinim la ime iot tapma na dalap tuo, uriet la makosarieng.

²¹Are ratmat ga arup tavuk gare tiruo la ut ira ruo: Na tara la tuga akosartang tavuk ila mumuri, tavuk ila kire la ume onoun alang tung.

²²Are ro: Na agat tung la tevurustung maset ume maimai ang Moses.

²³Pa orit non maimai la ut tapma ira ma napup ma neip tuo. Iruo non maimai la ume neunam ga maimai ang Moses la ut na muranama ruo. Ga urio maimai la man toirana meba tonang upat kukunim ieng kirinim ga uiale tobuo meba akosartang tavuk ila kire.

²⁴O kadik, saiktung ara! Aga la eba toagailie ga mapikang miruo neip la maionama pat kukunim ieng nuvarap?

²⁵Pa tivo temaieng ula muru me ai Morowa. Memani, na kukunim ang Iesu Karisito, Ila Kakani buang, irie la ume toagaulie ga tovugutuara iro kukunim maiong neip mila kiram. Are ratmat ga tunama gare tiruo: Na agat tung la tunama upat maimai ang Moses. Pa na neip tuo la tunama upat kukunim maiong dalap mila kiram la umaiale tobuo.