7 Kutiro taio in watungi lena, “Ra anung a kum torotoro na wasiso i ese mulusi lena, a wasiso anun o God i lingmulus, ma i ulabo pas a risano, sur asau ra o God i watung iau a tene sakino, ma an iru una nun a warkurai?”
8 Ara taro det watung laulau met, ma det takun met lena, met ususer a taro lenri, “Dat in pam a sakino sur a wakakino in nanpat talapor.” Ikut awu, ke lingmulus. Det ra det watung a wasiso ra, i sot sur det in iru una warkurai anun o God.
9 Asau ra dat in watungi una utna ri? Pepetlai, met a taro Juda met tokodos taun a taro gisen? Awu ut! A sa watung tari lena, a kum te Juda ma a taro gisen kai det elar kut. Dat rop dat kis utuntudu ina sakino petutna.
10 Elar nami ra di sa tumus tari una Buk Tabu lena, “Katutaio i tokodos, katutaio ut!
11 Katutaio kai ra i mananos. Katutaio i sisio sur o God.
12 Det rop det sa wan gisen gusun o God. Det rop ka det gas mo un tu utna. Katutaio tagun det i pam a wakakino, katutaio ut.”
13 “A kum wandet i papos elar nama kum tung na minat, ma a wasiso anundet i elar nama singino na minat. Det ser watung a kum torotoro nama kum karmendet.” “A wasiso tagun a wandet, i elar nama kusmapak na sui ra i ser karot doko a taro.”
14 “A kum wandet i bukus nama wasiso laulau ma i pitar a maut torom a taro.”
15 “Det raras sur det in um doko a taro.
16 Det kamar a kum utna, ma det ban laulau a taro una nundet a kum kisapi ra det wan iai.
17 Ka det tasman a kisapi na malmal.”
18 “Ka det ngara sur o God.”
19 Dat tasmani lena, asau ra a warkurai i wasiso uni, ke wasiso una taro ra awu sur a taro Juda kut, i wasiso una taro Juda utkai, ra det kis utuntudu ina kum Warkurai. I mo ra, a taro rop tagun a rakrakon bual det in tur na warkurai umatan o God, ma kataio in ipul lar pas.
20 I mo ra, katutaio in tokodos umatan o God, uni i mur a kum Warkurai. A kum Warkurai i ser ese dat kut una nundat a kum sakino petutna.
21 Ikut uniri, o God i sa pam tar a kisapi sur a taro det in tokodos umatano, ma awu sur uni det mur a kum Warkurai. A kisapi ri, a Buk na Warkurai ma a wasiso anun a kum poropet det sa wasiso puaso taru uni.
22 A kisapi ri tan o God, ma i lenri: A taro rop ra det nurnur kut un o Iesu Karisito, o God in watung det lena det tokodos. A taro Juda ma a taro gisen kai det elar kut.
