6 Afa nofeka enaig onigifi. Afa sa nufunam God amtakwalig eseteba ehe mas mungwali elim numwehe kwefihianugei.
7 Afa mingnag sa enaig esogog, asa kagelni mwakwal nihe ambala ogfug God eba nufunam nemug feg afa enaig heafna unehlagim fingi fegba haisegba God kam og amtakwalig el ne feg.
8 Asa mingnag el enaig onigig figim esog, sa big amtakwalig esig asa suialag pugufe. Mingnag el kagelim sehini og kagel enaig mo sihig. Afa ehengelni onigig eba amtakwalig asa God ehengelim amtakwalig mungwag faife.
9 Afa haisegba atiaho bigel Ju el Godna nof la suialag fig afa afwambanai el eba awai. Amo, eba awai. Afa ka ati nem sihianig Ju el afa afwambanai el bigel mungwali amtakwaligim ahnai skaufig.
10 Afa Godna buk enaig esog; Mas amban mungu afsug el feg mo. Awai nemug.
11 Afa mas amban mungu anwenagna feg mo Godim yisgiegim.
12 Afa mungwali el Godim nangu fwahigim asa esug el feg afa mas amban mungu suialag eseg mo. Awai nemug.
13 Afa ehengelni mo lagig algana fegim ofenai melni nifung lofeg. Afa ehengelni meleg la elim mwakwal fegonug. Afa ehengelni mo lagig elim tigifatig ofenai pou.
14 Afa ehengel nai yi haig haig agi mo memtola pugunig.
15 Afa ehengel ikagna afugum elim kwagiskugum.
16 Afa ehengel hanai yi gafa afugum gawigim amtakwaletifigim afa elim kinig faigog.
17 Afa ehengel mingnag el nanam mas aflahlanam augui.
18 Afa ehengel mas Godim ahnai skaufeni.
19 Afa big anwenafig bigel Ju el nihe mona ahnai skau afohie asa big Ju el enaig esofe ka mas amtakwalig esena mo. Asa God Ju el mi afa afwambanai el mi bigim gwenaig kwefihiagefe.
20 Asa mas amban el nihe mom patalkugum asa Godna nof la afsug afohieg mo. Afa nihe mona gafugag enaig eseg eba elim ambala ogfunag bigel amtakwalig eseg.