4 Yaho. Riipa hehar siitii kowutakiita. God riita batawa maji eeta siiken tawa. Ma ye woshepii maji batawak, God riita woshepii maji bakasakech. Riita mashi keyir maji riina eecha wocho: “Mii miiti maji na siiken maji ba ta. Batanak, miina ye i anasaney, kwota eeka kapaga siikiita.”
5 Nota kapasek yo sii eeta God riita otii tawa boboy kepin nona mukuchiney, nopa kapo shecha awasen wokiita? No kapo wokiita God rii nona wosawuchinyak rii kapasek otiito?
6 Yaho. Biish. God riita kapasek anasaney, riipa kapo boyega diita nosapek tawa ma miman anasatakiita? (Ma yechi inyaka eecha hiki taweyn, eena ada bato.)
7 Ada woshepii maji baney, eecha otiiney, God riiti omutiik tawa boboy siiken siii geenyik yanak, God riiti hadabas boboy kepin kawka henyak, kapo wohekiita: ada kapasek yon otii tari, boyewak God riipa ana pikiita?
8 Kapo ma por apa eecha wokiita: “Nota kapasek boboy na otiita. Otiitanak, God riiti boboy kepin nota hekiita!” Wowak, ma kaw eecha wocho: Diita otii tawa abon eena ada bato. Wowak, diita yikadey ma yepa ya kapasaken yakiita.
9 Wowak, nota kapo Ju ma kepi tawak, anadii ma kapasek tawa? Yaho. Ada kwona mukuchuwa kapasek yo otii tawa boboy nona eyey, Ju ma, anadii ma, nona eyey gamu poyetu.
10 Mashi keyir maji sii eecha wocho: “Ma kepi por takasakech. Yaho. Otii hechawa ma por takasakech.
11 God riina yesha he ma por takasakech. Ye eyey God riina magiirechir.
12 Eyey kapasek siir. Yo kepin otii ma por takasakech.
13 Yechi kuja tiiriimo supuga eecha tawa. Yechi tarakwoy sii woshepii majiban bato. Yechi kuja wo hopo kwoyayega eecha tawa.
14 Owuka eecha tawa kapasek maji yechi kuja takiikiisii siitiito.
15 Yecha amaba i man pi sowakwokiita.
16 Ye eechaba boboyen otii kapasek siitawak, man harapa nomo yatawa boboyen hato.
17 Ye podat nobok sii inyakan eshar eshar hikikasakech.
18 God riina akii tawa nobon ye makabek heechikasakech.”
19 Nota eecha hikitu eyey lo maji sii lon sumowuken otii tawa ma yenya bato. Eena ma por eecha wokasakech, “Ada ma kepi.” Yaho. Nota eyey nosapek tawa ma God riiti misoman hiibiiyaka tawa ma. Ma ye lon hechawey, ye yechi kapasek boboy hechawey, yecha yechi kujan dasiipeto.
20 Lon sumowu tawa nobon sumowuk otiiney, ii ma God riiti misomak kepi otiikasakech. Lo sii noti kapasek boboyen eena mukuchichu.
21 Wowak, God riita ma kepi siik riiti misomak otiiwa nobon God riita nona geenyik mukuchir. Ii o siina sumowu nobokasakech. God riiti maji piirapet yechi maji eeta geenyik kwodii wochar.
