Rom 3:4-19 in Mutu

⁴ Maau kat! Ighaze tamtoghon tisob tigham kaarom, tigham kaarom lak! Eemoghon Maaron saveeŋ toni, nene onoon moghon, ve ye itataghon saveeŋ mbuaaŋ toni irau sawa isob. Saveeŋa timbooda pataghaaŋ wa. Tighaze: “Maaron, saveeŋ isob to usasavia, nene tamtoghon tighilaala tighaze deŋia moghon. Ve ighaze koiamŋa tipayoon ghom pa savsaveeŋ, nene pale ulib padi.”

⁵ You nawatag. Ndiran pida to titaghon ŋgar to taan, pale tighamun saveeŋ tighaze: “Ighaze sosor toit ipaghazoŋan ŋgar deŋia to Maaron, pughu vena to ye ate yabyab pait ve ighur atia pa sosor toit? Ŋgar toni tonowen, deŋia maau. Pasa, ighaze iit tagham sosor maau, nene pale ye le ataam eta pa ipatooŋ ŋgar toni deŋia ivot ighazooŋ ne maau.

⁶ Ŋgar tovene poia maau kat! Ighaze Maaron itaghon ŋgar deŋia maau, nene pale iŋgabiiz iit tamtoghon to taan vena?

⁷ Ve tamtoghon ite pale isaav sorok ighaze: “Ŋgar kaarom to you naghami, nene iuul Maaron. Pasa, ipaghazoŋan ŋgar toni to ye avo onoon ivot ighazooŋ. Ve mbeb tonene pale igham tamtoghon tipait iza. Ve ighaze venen, pughu vena to ye iŋgabiiz ghou ighaze you nagham sosor, ve ighur atia payou?”

⁸ Ŋgar tovene, nene inimale saveeŋ to yes to ŋgar todi iwaghamgham tighaze iit tagham ŋgar samia, ghoro poia. Pasa, ŋgar toit samsamia pale inim ataam pa mbeb poia ivot. You nawatag: Ndiran pida tiŋgal saveeŋ payou sorok tighaze you navovotia saveeŋ tovene pa tamtoghon. Ndiran tonowen, Maaron tau pale ighur atia padi. Ve ighaze ye igham tovene, nene pale deŋia.

⁹ Tovenen pale tasaav vena? Yei Yuda nilib pa yes to Yuda maau? Maau kat! Pasa, you navotia sosor toit ivot ighazooŋ wa. Iit tasob taneep ila samia lolo. Yes Yuda, ve yes to Yuda maau ne paam.

¹⁰ Saveeŋa timbooda pataghaaŋ wa. Tighaze: “Tamtoghon eta ineep deŋia ila Maaron mata maau.

¹¹ Ve tamtoghon eta le ghilalooŋ maau. Eta izuaria tau pa Maaron maau.

¹² Pasa, tamtoghon tisob tipul ataam toni wa. Tauto tiwaghamgham, ve irau tigham uraat poia eta maau. Todi eta igham ŋgar poia maau. Tisob tisami moghon.

¹³ Saveeŋ mbuuza to ivotvot ila avodi, nene inimale naal to avo ikakaak. Avodi kaarom, ve saveeŋ todi iwaghamun tamtoghon inimale moot samia. Pasa, saveeŋ samsamia naol ivotvot ila avodi.

¹⁴ Tovenen avodi poia maau. Moghon moghon tipipiyaav saveeŋ samsamia pa tiwaghamun tamtoghon.

¹⁵ Sawa isob, tilandaad pa rabuuŋ tamtoghon timatmaat.

¹⁶ Ataam to titaghoni, nene ataam to tawaghamun tamtoghon ve tagham pataŋani padi.

¹⁷ Tovenen ataam to talup ghiit tanim ee moghon ve taneep toman lolood luuma, nene yes tiwatagi rita maau.

¹⁸ Ve Maaron paam, timatughez pani maau, ve matadi iŋgali rita maau.”

¹⁹ Iit tawatag: Saveeŋ isob to ineep ila tutuuŋ to Mose, nene iŋarua yes Yuda to tineep ila tutuuŋ samba. Eemoghon yes titaghon katin tutuuŋ tonowen maau. Tovenen iit tamtoghon tasob to taneep izi taan, tutuuŋ to Maaron ineep pa ipoon avood ve ipamundigin ŋgar toit. Leso taghilaal sosor toit, ve tawatag taghaze Maaron pale ighur atia pait.

⁴ Mako kat! Isaav ighe tamtamon tisov tigham karom, tigham karom lak! Eemon Maaron saveeŋ tooni, ene onoon mon, ve i itataghon saveeŋ mbuaaŋ tooni irau saawe. Saveeŋa tiboode pataghaaŋ wa. Tighe: “Maaron, saveeŋ isov tau usasavia na, tamtamon tighilaalo tighe ene iduduuŋ mon. Ve isaav ighe koiamŋa tipayooz ghom pa savsaveeŋ, ene aat uliiv zi.”

⁵ Yau nawatagh. Zeran siriv tau titaghon ŋgar to taan na, pale tikau saveeŋ tighe: “Isaav ighe sosor toit ipaghazoŋai ŋgar duduuŋa to Maaron, puughu mindai ta i aate yavyav pait ve ighur atuya pa sosor toit? Ŋgar tooni tawe, iduduuŋ mako. Pa ighe iit tagham sosor mako, ene aat i le eez eta to itotoi ŋgar tooni duduuŋa ivot ighazooŋ mako.

⁶ Ŋgar tauvene irau mako kat! Isaav ighe Maaron itaghon ŋgar duduuŋa mako, pale igabiiz tamtamon tau tileep izi taan ne mindai?

⁷ Ve tamtamon ite pale iŋooŋ pa Maaron sorok ighe: “Ŋgar karom tau yau naghamu ne, ene iuul Maaron. Pasaa, ipaghazoŋai ŋgar tooni tau i aavo onoon na ivot ighazooŋ. Ve gabua tane ta igham tamtamon tipait eeza. Ve ighe tauvene, puughu mindai ta i igabiiz ghau ighe yau nagham sosor, ve ighur atuya payau?”

⁸ Ŋgar tauvene, ene imin saveeŋ to yes tau ŋgar toozi ivaghamgham tighe: Iit tagham ŋgar sasaghati o poia. Leso Maaron ireua pait ve igham eeza tiina pa poia tooni. Yau nawatagh: Zeran siriv tiŋgalŋgal saveeŋ payau sorok tighe yau navovotia saveeŋ tauvene pa tamtamon. Zeran tawe, Maaron tauu pale ighur atuya pazi. Ve isaav ighe i igham tauvene, ene aat iduduuŋ.

⁹ Tauvene pale tasaav mindai? Yei Yuda niliiv yes tau Yuda mako na? Mako kat! Pasaa, yau navotia sosor toit ivot ighazooŋ wa. Iit tasov taleep ila saghati loolo. Yes Yuda, ve yes tau Yuda mako na paam.

¹⁰ Saveeŋa tiboode pataghaaŋ wa. Tighe: “Tamtamon eta iduduuŋ ila Maaron maata mako.

¹¹ Ve tamtamon eta le ghilalooŋ mako. Eta izuari ghi pa Maaron mako.

¹² Pasaa, tamtamon tisov tipul eez tooni wa. Tauta tivaghamgham, ve irau tigham uraat poia eta mako. Toozi eta igham ŋgar poia mako. Tisov tisaghat mon.

¹³ Saveeŋ mbuuza tau ivotvot ila avozi na, ene imin naal tau aavo ikakaak. Avozi karom, ve saveeŋ toozi ivavaghamunia tamtamon imin moot saghati. Pasaa, saveeŋ sasaghati naol ivotvot ila avozi.

¹⁴ Tauvene avozi poia mako. Monmon tisiksik saveeŋ sasaghati to tivaghamunia tamtamon.

¹⁵ Saawe isov, tighe le tiliŋliŋ siŋ pa tamtamon.

¹⁶ Yes titaghon eez to tivaghamunia tamtamon ve tighur pataŋani pazi.

¹⁷ Tauvene eez to tavalupu ghiit tamin eemon ve taleep toman loloon luuma, ene yes tiwataghi rigta mako.

¹⁸ Ve Maaron paam, tiroi pani mako, matazi iŋgali rigta mako.”

¹⁹ Iit tawatagh: Saveeŋ isov tau igheen ila tutuuŋ to Mose na, ene iŋarui yes Yuda tau tileep ila tutuuŋ tawe saamba. Eemon yes titaghon duduŋai tutuuŋ tana mako. Tauvene iit tamtamon tasov tau taleep izi taan ne, tutuuŋ to Maaron igheen to ipoon avoon ve ipaburigin ŋgar toit. Leso taghilaal sosor toit, ve tawatagh taghe Maaron pale ighur atuya pait.