4 To bagai agef ilauf! Negur ĩ momoi bagai, age fe di, tamo ganan idegẽya temeleid tauf. Are Negur nẽ Itotoya bun ibodok kilei, “Are sain õ wogõ wouf bun, õ madur bagai anĩ yaorouf, sain õ es diyõf bun, õ wal wediyouf nigin.”
5 Anĩ ere, ada neda madur bagai sã anim, Negur nẽ madur bagai fatuk bagai yaor fouf are, ada ere tauf? Negur ĩ ada bun yogon didi ifanadauf nigin, ĩ madur sã tauf de? Aya tamo nẽ luwa irouya anĩ wogõ auf.
6 To bagai agef ilauf! Age fiyauf are, Negur tamo kayau naig fe es fediyouf?
7 Taka nem monẽ ye fen, irõf, “Neu idegẽya anim Negur nẽ momoi bagai anĩ yaau du fe di, anĩ bunem, yogon fula fiya medeĩya odugouf are, ere nigin aya fau mosor tamal ya ani, bouwau bun inouf?”
8 Ere nigin to eig youf, “Biya anĩ wõ youf nigin, ada sane age tafouf” youf? Tunĩ amam od enei wogõ maudig de fen, amã bouwamã yũya od dirõdig. Negur idi es feid fen, mala solo ifenẽdiyouf.
9 Amã ere mauf? Juda amã haiden wal fediya de? Gai sã bagai! Amã mogo, Juda ado haiden geid ganan mosor farumen kilei kilei dibodok ya anĩ, moron.
10 Are Negur nẽ Itotoya bun ibodok kilei, “Madur bagai taka to ibodok, tekelei bagaig sã;
11 taka nem kisi fokõya sã, taka nem Negur imirẽya sã.
12 Ganan Negur nẽ naab fasis dife fen, ganan sesen len; aibem taka to biya age fedig, tekelei bagaig sã.”
13 “Idi neid uleidbanĩ, laa nẽ meku awa dede fiya sã gen; idi neid baleid idegẽya wogõ dedig.” “Gogour sane nẽ mũ sigoredin ibodok.”
14 “Idi neid eweid, isisĩya ado dirikeĩ bagai.”
15 “Idi neid yeid, tamo didenkesiyouf nigin tuninirya sã kaisã bagai dirãdig;
16 idi neid iyõya bun, daũ fiya ado morõ dinodig,
17 age de fen, wau inosiya nẽ naab idi keleĩ sã.”
18 “Idi neid meleid bun, idi Negur nigin kumĩ sã.”
