Rom 3:11-27 in Yessan-Mayo

¹¹ Yike tame wuri re purere yenbo bo. Yike tame wuri re God rene be sopbo.

¹² Rem aboyei rem God rene magel taikeipem. Aboyei rem yaper woswou nenbem. Remri yike be wos yenbo be wuri nenbo. Buposubuwai.

¹³ Remri elemoike webo tuma et tame pen sabo tuma. Biyir sopo rem tame tan sabokap, remri taule rem yikoko tumakene tatame remne yaper nenbo tumakene webo.

¹⁴ Rem agerbo tatame remne pap yoken suyogu wurabo, remne yaper nente webo.

¹⁵ Rem agetage yin tatame remne pen sabo.

¹⁶ Rem mak yibo, rem nugwape wosbas sowen tatame remne yaper nenbo.

¹⁷ Agerbo tatamekene heyar me temente wule rem be sanetene.

¹⁸ Rem God rene be habobo, rene be akbo. (Buk Song 36:1) God Reri Siglow tuma etop webo.

¹⁹ Nem mettene. Moses Rene Newom Wule re ete Wule kulke tetane tatame remne tuma nenbo. Opkap, yike tatame be wuri wete, an God reri wule be biragiyebo. Nem aboyei nowselri tatame nem God reri wule biragiyebo. God re nemne aboyei tuma nente tetane.

²⁰ Tatame rem Moses Reri Wule nente, God re remne op be wete, kem tatame yenbo. Yehow. Moses Reri Wule nemne peterabo, nem aboyei nem Wule biragiyebo tatame. (Buk Song 143:2)

²¹ Gwopte God re tatame remne tatame yenbo webo wule tegek tem. Et agerbo wule, et Moses Reri Wule bo. Moses Reri Wulekene God Reri Tuma wesowbem tame, rem er yuriri wule siglowke kirkir basrasem.

²² God re tatame remne yenbo webo wule re gwopkap. Tatame rem Jisas Krais rene omuteke habobet, God re remne op wete. Kem ari tatame yenbo. Juda tatamekene Juda bo tatamekene God re remne etopwou nenbo. Eker agerbo kelow bo.

²³ Nem aboyei tatame nem yaper wos nenbo. Eker nem yabel rik pastene God rene mapurke yin late.

²⁴ Op tetane, God re nemne pap meten kwobo lam. Jisas Krais re nemri wule yaperke san teitkwunem. Eterke God re nemne tatame yenbo wen nemne sene potbo. Nem yaku wuri be nenem. Krais eterke God re nemne pap bupo me meten nemri wule yaper poten septim.

²⁵ God re Jisas rene leban re tatame remri nenbo wule yaperke sam. Samke, re remri yaper nen wos eterri nepke God rene kwar pem. Opkap yike tatame rem etop omuteke habote, God re remri wule yaper magelke rasen remne tuma sene be nente. Re etop nenbo, re reri sagunatene wule nemne peterabo. Kiyi temenem tatame rem yaper wos nenbem, God re remne lewouke lan yaper sein agetage be nenbem.

²⁶ Gwopte re remri wule yaper lewouke be labo. Re reri sagunatene wule nemne op peterabo. Re Jisas rene omuteke habobo tatame etemnewou tuma sene be nente tetane.

²⁷ Nem Moses Reri Wule nente wem, God re nemne tatame yenbo wete wem. Nem Jisas rene omuteke habobo, eker God re nemne tatame yenbo webo. Eker nem kworer mapurke gabote.

¹¹ Porereken tatame beke wuri te. God erne sopbe tatame beke wuri te.

¹² Eme akei eme God erne magel tayem. Eme akei wule yaperwou nenbe. Tame wuri be wos yenbo beke wuri nen. Beraiwai.

¹³ Eme tuma yaper wobe, emri elemoi e tame kupa rasten sele meikap. Emri tawul e yikwokwo yakwokwo tuma wobe tawul. Sopo yaper eme tame tabekap, eme tatame emne elemoike tuma yaper wobe, eme pap yaper tebe.

¹⁴ Eme pap wayen yegu wutoube, tuma nogwape tetan.

¹⁵ Eme tewok amen yibe, tatame emne pen sabe.

¹⁶ Eme mak yi mak yibe, eme wule yaper kenake nenbe, eme tatame emne yaper nenbe.

¹⁷ Noub sibe wule eme beke nen.

¹⁸ Eme God erne beke aken abo. God eri siglou etep wobe.

¹⁹ Nema metten. God eter Moses erne newom wule kulke tetan tatame eme God eteri wule akei tobote. Etepkap, God eter Moses erne newon wulek ere wule yaper toboten tatame emne noub lan awosein nente nenbe. Etepkap, beke eme etep wote? Nema God eteri wule beke tousi. Akei nowselri taken tameken eme God eteri wule tousibe. God ere emne akei tuma namdete nenbe.

²⁰ Etepkap, God eter Moses erne newom wule tobobe tatame emne God ere beke kip wo, kem tatame yenbo. God eter Moses erne newom wule e nemne peterabe, nema tatame yenbo berai. Nema tatame yaper.

²¹ Sene God ere tatame emne tatame yenbo wote wule ere genik tem. E Moses eterne kiyi newom wule berai. God eteri kiyiri tuma wusoubetem tame, eteri wule bas rasem tame eme ete yuri tete wule eme tatame emne wusoubetem.

²² God ere tatame emne yenbo wote wule ere gwopkap. Tatame eme Jisas Krais erne kenawaike abobetete, God ere emne etep wote. Kem ari tatame yenbo. An kemne pette, kem arenken temente. Etep wote.

²³ Metye. Tatame akei eme kir nenbe, eme wule yaper nenbe. God eter womkap eme beke nen, eme God eteri kom mapeke kip yi?

²⁴ Sene God ere etep wom. Jisas Krais eterke an emne kobo bepou me lan sene pette. Krais ere emri nenbetem wule yaper tukem, eke an emne etep wobe. Kem tatame yenbo. Etep wom.

²⁵ Ere Krais erne ek yan ere tatame etemne kobo lan ek sam. Samke, ere emri wule yaper eteri nepke tukem. Tatame eme etep kenawaike abote, God ere emne beke kip pen sa, ere emne tatame yenbo wote. Ere etep tem, ere eteri awosein nenbe wule emne peteram. Kiyi temenem tatame eme wule yaper nenbetem, God ere emne lewouke lan yaper awosein mak nenten. Sene Jisas ere sam, eri nepke God erne kwar pem.

²⁶ Gwotepte kir nema eter awosein nenbe wule yenbo labe, nema abobe. God eter ere tame yenbowai. Eter ere wobe. Jisas erne kenawaike abobe taken tameken eme tatame yenbo.

²⁷ Nema etep abobe, nema nemri sig maime yenbo mapeke kip wo? Nema God eteri wule noub nenbetem, eke nema tame yenbo tem o? Berai. Nema God eteri wule noub beke nen, nema neremri sig maime yenbo mapeke kip wo. Nema Jisas erne kenawaike abobe, eke God ere wobe, nema tatame yenbo. Etep ten nema nemri maime sig yenbo mapeke kip wo.