2 Dat tasmani lena, ra o God in warkurai det, ra det pam a kum sakino petutna, anun a warkurai ra i tokodos.
3 Mot a taro oros kut, ra mot takun det ra det pam a kum sakino petutna, ikut mot kai mot ser pami, mot nuki lena mot in kalabor eno pepetlai? In warkurai mot ut.
4 I sa ese anun a wakak na petutna ra i bukus torom mot, ma ke warkurai lakit mot una numot a kum sakino petutna, ma a pinino ke ngoro lakit nam mot. Pepetlai, mot nuk penpen kut una nun a kum wakak na petutna ra? Pepetlai, ka mot tasmani lena, i maris mot lenri sur mot in nukpukus?
5 Ikut, a balamot i dekdek ma ka mot nukpukus, ra mot ubek tomo anun a kankan netes un mot, sur a bung na kankan anun o God, ra anun a tokodos na warkurai in nanpat talapor.
6 O God in warkurai arara, elar ut nama pinapam ra i sa pam tari.
7 Det ra det dekdek una wakak na pinapam sur o God in pitar a minamar torom det, ma in ulabo pas a risandet, ma det nem a nilaun ra ken rop, o God in pitar a nilaun tukum tandet.
8 Ikut torom det ra det ser ulabo pas det melet ut, ma ka det mur a lingmulus na wasiso anun o God, ma det muri kut a sakino petutna, o God in kankan, ma in balano sungun torom det.
9 Ma in pitar a mamaut, ma a labino ngunungut torom a taro rop, ra det pam a sakino. Torom a taro Juda mugu, ra numur torom a taro gisen kai.
10 Ikut, torom det rop ra det pam a wakakino, o God in pitar a minamar torom det, ma in ulabo pas a risandet, ma in pitar tar a malmal torom det. Torom a taro Juda mugu, ra numur torom a taro gisen kai.
11 Uni, a warkurai anun o God, ke senene, i elar rop kut torom a taro rop.
12 A taro rop ra ka det tasman a Warkurai anun o Moses, ma det pam a sakino petutna, det in iru ut. Ma lenkutkai ra torom det rop ra det tasman a Warkurai, ma det pam a sakino, o God in warkurai det elar nama wasiso na Warkurai.
13 Uni, awu sur det rop ra det longoro a Warkurai det tokodos umatan o God, awu. Det kut ra det mur rop a Warkurai, din watung det a kum tene tokodos.
14 A taro ra awu sur a taro Juda, det ra ka det tasman a Warkurai, ikut det pami ut a wakak na petutna, elar nama Warkurai, i ese i lena a Warkurai kura ut una gapindet.
