13La vuhula La Tahalo Uru, eia kama veia etato taritigi ale etato rovi la merera tetala, ouka. Eia ge masaga moli etatou mai etato ge roromuli tomi molia. Me mai moli ele eia ge toia somai tegatou veia etatou maroka.
14La valalua la maligoma kama rovi la merera te La Tahalo Uru, eala moli mai egite ge gabutatala tigi, me ge poga tavu sesele la merera tetala, tio egite koramulia ge tuga matata moli mai ele, la vulovulo giteu ge veipalea veia La Tahalo Uru vipou egite, egiteu la kalulu giteu oio, eala moli egite so popou te la maligoma.
15Eala moli mai egite ge pou tataho moli, la vulovulo giteu ale taritigi eia veipalea mai ele veia La Tahalo Uru eia vipou egiteu, la matagaga tetala tai bakisi eia oio tegite. Mai egite ge ruru, egite ge gabutatalea, egite kama koramulia veia ge ruru bulalahu, ouka, egite ge gabua. Me mai egite ge pou tigi tai, la tia giteu oilo ge malilo tataho, egite kama ge gabutatala papai.
16Me La Tahalo Uru eia ge mata mulimuli la vulovulo giteu mai ele te la tapasi la haro ale eia ge baha e Latula e Iesus Kraist, veia eia ge mata mulimuli la vulovulo gatou, me etato ge magiri te la vigagiala tetala. Eia sesele, mai la valolo taku eau veitia mutou ovola.
17Eala moli amutou e Iuda, amuto ge vei lou lava? Amuto vei mago “Eau la tahalo la lotu, la merera te La Tahalo Uru eia suliau, eau isasa, eau tetalati.”
18Me eia sesele, la merera te La Tahalo Uru eia tovo tataho amutou, amuto matagagati te la gauru ale taritigi.
19Amuto magiri veia amuto ge tata egiteu la mata kea soio te la gauru ale matata. Amuto magiri tai veia amuto vimatagaga egiteu ale pou te la maligoma.
Rom 2
Rom 2:13-19