8 Iri a mugano utna, una risan o Iesu Karisito, a watung wakak torom anung a God un mot rop, uni a taro tagun a rakrakon bual rop, det wasiso puaso una numot a nurnur.
9 A papam torom o God nama nung a nilaun rop, ra a ser warawai nama Wakak na Wasiso un o Nutunu, ma o God ut i tasmani lena, a ser nuk pas mot
10 nama nung a kum niaring una kum bung rop. A wararing kai lena, ra a nemnem ut anun o God, kanapi an pet sot pasi ut sur an nanpat torom mot.
11 A nem doko i sur an tama mot, sur an tabor mot nama etabor, sur in udekdek a niomot.
12 Lenra, ra an tama anumot a nurnur, ma mot kai mot in tama anung a nurnur, dat in uragot etetalai dat.
13 A kum tistising, a nemi sur mot in tasmani lena, a susut na bung a nuki lena an nan torom mot, sur an warut mot tuk ra an tama a win anung a etowo una numot a nilaun, elar nama win anung a etowo ra a tama i una kum tamon gisen tandet ra awu sur a taro Juda. Ikut, tuk uniri, a kum utna i turbat iau, ma ka wan lar pas.
14 Anung a pinapam utra, o God i pitar tari tang, sur an warawai torom a taro ra det tasman a wasiso Grik ma a taro ra ka det tasmani kai, torom a kum tene mananos ma det ra anundet a mananos ke labo.
15 I mo ra a nem doko i, sur an warawai nama Wakak na Wasiso torom mot kai, tiro o Rom.
16 Ka maimai una Wakak na Wasiso, uni i a dekdekin o God sur in ulaun pas a taro rop ra det nurnur. Torom met a taro Juda mugu, ma uniri torom mot kai, ra awu sur a taro Juda.
17 Uni a Wakak na Wasiso i upuaso a kisapi ra o God i pami, sur a taro det in tokodos umatan o God. A kisapi na nurnur kut, a taro det in tokodos uni, a nurnur sot kut tagun a turturkibino tuk una ururopino. Elar nami ra di sa tumus tari una Buk Tabu lenri, “Osi kut ra i nurnur, o God in watungi a tene tokodos, ma in laun.”
18 O God i upuaso anun a kankan tagisapat una langit, uni a taro ka det mur a petutna ra i wakak umatano, ma det pam a sakino, ma una nundet a kum sakino petutna, det turbat a lingmulusino.
19 O God i kankan, uni a kum utna ra din tasmani un o God i talapor kut torom det, uni i ut i sa utalapor tari torom det.
20 Turpasi una ukukis ina rakrakon bual, a taro det tama a kum ukukis. I mo ra det pet lar pasi sur det in tasman a kum magiran o God, a kum magiran o God, ra ka din tama i. Det tasmani lena, a dekdekino in tur tukum, ma i o God. I mo ra katu kisapi sur det in ipul ru i.
21 Det tasmani ut o God, ikut ka det ulabo pasi lenri, i a God, ma ka det watung wakak kai toromi. Det nuk penpen oros kut, ma a balandet i dumirum, uni kalako mananosin det.
22 Det watungi lena, det mananos doko, ikut det wanpat a kum longlong.
23 Ka det lotu torom o God ra i laun tukum, ma i bukus nama minamar. Det lotu kut torom a kum toktok ina kum musano ra det ser mat kut, ma torom a kum toktok ina kum piko, ma a kum wewegua, ma a kum utna ra det kaukawar nin upiso.
24 I mo ra, o God i madek tar det sur det in pam a kum dur na petutna elar nama kum sakino nemnem tagun a balandet, ra det in pam a petutna na maimai etetalai una pinindet.
25 Det keles ru a lingmulus na etowo anun o God sur a torotoro. Det lotu ma det wararing mukut torom a kum utna ra o God i ukis tar det, ma ka det lotu mo torom a Tene Ukukis, i ra din watung ulabo pasi ma in tur tukum. Amen.
26 I mo ra, o God i madek tar det una nundet a labino nemnem sur a kum sakino petutna na maimai. I lenri: A wardain det keles ru a kisapi na nolin, ra di sa ukis tari, ma det ser inep etetalai nam det melet ut.
27 Lenkutkai ra a kum musano, det wan gisen gusun a kisapi na nolin ra di sa ukis tari lena, det in nolin nama wardain, ma a balandet i kalkal doko sur a kum musano, ma det pam a sakino torom det melet ut a kum musano. Kalako maimai indet, ra det pami lenra. Det ut, det los a warkurai na minabalu, ra i sot nam anundet a kum niraro.
