7 Mot in pitar anung a marmaris kai torom o Andronikus ma o Junias, aru kukung ra der kis tomo nam iau una karabus. Epotor tan a kum aposel a risander i wan sarara. Der aru mugano te Karisito tang, ma iau, a mur tander.
8 Mot in pitar anung a marmaris torom o Ampliatus, i ra a nem doko i una risan a Labino.
9 Mot in pitar anung a marmaris torom o Urbanus, ara tene pinapam kai tagun met una pinapam anun o Karisito, ma torom a wakak na pasang kai o Stakis.
10 Mot in pitar anung a marmaris torom o Apelis, i ra di sa lar tari ma i upuaso i lena i a tene nurnur mulus un o Karisito. Mot in pitar anung a marmaris torom det ra tagun a rumu anun o Aristobulus.
11 Mot in pitar anung a marmaris torom o Erodion, a kukung. Mot in pitari kai anung a marmaris torom det tagun a rumu anun o Nakisus ra det tagun a Labino.
12 Mot in pitar anung a marmaris torom o Tripina ma o Triposa. Aru ino ri, der sa pam tar a dekdek na pinapam sur a Labino. Mot in pitar anung a marmaris torom ara wakak na pasang kai o Pesis, ara ino ra i sa pam tar a dekdek na pinapam sakit sur a Labino.
13 Mot in pitar anung a marmaris torom o Rupus, i ra a Labino i pilok pasi. Mot in pitar anung a marmaris torom o nano kai. I warut iau elar ut nam o nang.
14 Mot in pitar anung a marmaris torom o Asinkritus, Plegon, Ermes, Patrobas, Ermas ma a kum tistisin dat kai una nurnur ra det kis tomo nam det.
15 Mot in pitar anung a marmaris torom o Pilologus ma o Julia, o Nereus ma a tisino a ino, ma o Olimpas, ma a taro rop anun o God ra det kis tomo nam det.
16 Ra mot epastorom, mot in maris etetalai mot nama egom na marmaris, ma mot in pami elar nami ra mot anun o God. A taro na lotu anun o Karisito tagun a kum tamon rop, det pitar anundet a marmaris torom mot.
17 A kum tistising, a saring mot sur mot in tumarong mot gusun a taro ra det ser pagol susuaro a taro na lotu, ma det watung a kum wasiso ra i turbat a kum etowo ra mot sa rakon pasi. Mot in nan gisen gusun det.
