Rom 16:7-17

⁷Muat na haatne leh mah Andaronikus ma Iunias ira iruo hinsakagu, dir ing dir ga kis tika ma iau tano hala na harpidanau. Ma ta diet ing di tule diet wara hinahaan ma no tahut na hinhinawas, ira matanaiabar diet manga ru dir. Ma dir ga huna kis narako ta Krais nalua tagu.

⁸Muat na haatne leh Ampiliatus no nugu bilai na harwis tano udahat kinkinis narako tano Watong.

⁹Muat na haatne leh mah Urbanus nong i la paapalim tika ma dahat wara gaie Krais, ma muat na gil huo mah taar tano nugu bilai na harwis Sitakis.

¹⁰Muat na haatne leh Apeles, aie nong ira ngunngutaan i te kabit ie ma i te hamines hapalai bia i mur timaan Krais. Muat na haatne leh diet ing diet tano hatatamaan tane Aristobulus.

¹¹Muat na haatne leh Herodion no hinsakagu. Muat na haatne leh diet tano hatatamaan tane Narsisus ing diet kis tano Watong.

¹²Muat na haatne leh Tiripina ma ne Tiriposa, kaike ira iruo hahin ing dir papalim dadas tano Watong. Muat na haatne leh mah no nugu bilai na harwis Persis, aie tiga mes na hahin mah nong i te manga papalim dadas tano Watong.

¹³Muat na haatne leh Rupus nong no Watong i te gilamis ie. Muat na gil huo mah tano pawasine nong ga ngan bia a pawasigu mah ie.

¹⁴Muat na haatne leh Asinkiritus ma ne Pelegon ma ne Hermes ma ne Patrobas ma ne Hermas ma ira hinsaka dahat mah narako ta Krais.

¹⁵Muat na haatne leh mah Pilologus ma ne Iulia ma ne Nereus ma no hainine ma ne Olimpas ma ira matanaiabar bakut ta God ing diet kis tika ma diet.

¹⁶Muat na haatne harbasiane muat ma muat na gawane harbasiane muat ma ra tahut na magingin. Ma ira matanaiabar na lotu bakut gar ta Krais ta ira tamtaman, diet haatne um muat.

¹⁷Bar hinsakagu ta Krais, iau haragat muat bia muat na harbalaurai timaan ta diet ing diet la gilgil ra harpaleng ma ing diet bul tukatukai ta ira numuat nilon, ira mangana magingin ing i mes harsakit tano harausur muat te kap usurane leh. Muat na haan pas diet.