8 A atongi ta mulo mange, e Karisito i hanot arlar ana tena titol anuna tarai Juda, sur ir tolsot pas a lelela ane God ning i tol tari tetek na tumtubunla. Ning i toli larning i asangani mang a warwara ane God i momol.
9 I hanot otleng sur a tarai ning bel a tarai Israel lar atong leklek pas e God ana nuna marmaris. Larning di ka tumus tari ting na Buk Tabu mange, “I maining ar atong leklek pas u napir a tarai ning bel a tarai Israel, pa ar saksak na atong leklek tetek u.”
10 Pa di ka tumus tari otleng mange, “Mulo a tarai ning bel a tarai Israel, mulor gasgas taum ana tarai ane God.”
11 Pa di ka tumus tari otleng mange, “Mulo a tarai rop ning bel a tarai Israel, mulor atong leklek pas a Leklek, mulo a kaba taraila rop mulor saksak na atong leklek pasi.”
12 E Aisaia otleng i warwara na propet o e Karisito mange, “Takai ir hanot miting na kaba tarai e Jesi arlar ana sibul ning i gomo miting na wakir a rakai. Ir king pa ir nigon a tarai miting na matanitula, pa a tarai ning bel a tarai Juda lar tortorot onoi, pa lar harnanai ana tortorot sur a wakakna ning ir toli.”
13 Pa nunung tetek e God, esaning dala harnanai suri ana tortorot sur a wakakna ning ir toli. A nunung sur ir abukus mulo ana tnan gasgas pa a bal molmol, ning mulo tortorot onoi. Pa ana rakrakai ana Talngan Tabu ot, mulor harnanai ana tnan tortorot sur a wakakna ning e God ir toli lamur.
14 Na tastasikla, a tasmani ot mang mulo bukus ana wakak a toltol pa a tastasim, pa mulo tolsot pasi sur mulor asaer artalai mulo.
15 Ika, te na pas ne a warwara kol ana dingla na ututna, sur mulor nuknuk ulak onoi. A tumtumus tetek mulo, anasa ana nuna marmaris, e God i aslang pas iau,
16 sur ar tena titol ane Karisito Iesu tetek a tarai ning bel na tarai Juda. A arlar ana tena artabar tetek e God, ning a warawai ana Wakak a Warwara ane God, sur a tarai ning bel na tarai Juda la anuka artabar tetek e God ning ir gas onoi. Pa a Talngan Tabu ka atotoh tar la.
17 O e Karisito Iesu, a gas kol ana nuka titol tetek e God.
18 Bel a mang sur ar warwara ana ta utna masik. A mang sur ar warwara ka ana titol ning e Karisito ka tol tari ana kuk, ning a ben a taraila ning bel a tarai Juda sur lar longor tetek e God. La longor teteki anasa ana ututnala ning a atongi pa a toli na arpotor tanla.
19 La oroi a rakrakai ana akinalangla pa a ututnala na kulkulan ning a toli ana rakrakai a Talngan Tabu. Manglarning misaot e Jerusalem tuk to e Ilirikum ia ka warawai rop pas tingia ana Wakak a Warwara ane Karisito.
20 Ana kamkama nuka titol tetek e Karisito tuk onone, anuka tnan nuknuk sur ar warawai ana Wakak a Warwara ting na hananuala ning bel la tasman e Karisito, sur gong a tol a rumai saot na kamkam a rumai ning tik ka atur tari.
21 Larning di ka tumus tari ting na Buk Tabu mange, “La ning belot di atai la onoi, lar oroi, pa la ning belot la longori, lar tasmani.”
22 A tohi sur ar han tetek mulo, ika a molot ana titol na warawai ting na hananuala. I a kamkamna ning belot a han tetek mulo.
23 Ika, onone anuka titol ka rop ana paparla ne. Ka galis a rau ana nuka tnan nuknuk sur ar oroi mulo.
