Rom 12:3-13

³La Tahalo Uru hilovitiau te la gilogo tetala veia eau ge la bilalaha tetala. Tio me oio vola eau karasuku amutou te la merera tetala maie: Umala eme ge vauru loume veia eme isasa. Gabutatala tigi, umala eme ge vauru bulalahu eme, eme ge hilovi tigi muga la mari ale La Uru abiamu veia eme la tahalo te Kraist sesele ka ouka.

⁴Etatou ale te Kraist, etato igoie pou mai la vovole Kraist sesele. Mai etato tomi la lima gatou, la vaha gatou, la kuku gatou oio, me la igogolu tai oio te la baututu la vovo gatou isasasa, La Tahalo Uru tabaritia mai ele. La lima gatou eia te la igogolu isa, la vaha gatou eia te la igogolu isapolo, eala moli la vovo gatou eia isa moli.

⁵Eala, eia matagaga tai mai ele veia etato tomi mai la vovole Kraist.

⁶Te la gilogo tetala, La Tahalo Uru tabariti letatou la vaabila tetala ale koramuli la igogolu tetala ale etato ge igoa. Mai la vaabila tetala soio taume eia te la veipalala la gabutatalala te La Tahalo Uru soio te la valalua, tio eme ge igo molia mai la vagagarila taume ale eia abiamu te la gilogo tetala.

⁷Mai la vaabila tetala soio taume eia te la igogolu la visuli, eme ge suli la valalua me hatavivile tomi te la lotu. Mai eia toiti leme te la vimari, tio taritigi eme ge vimari la valalua me hatavivile.

⁸Mai eia toiti leme veia eme ge viteteli la valalua me hatavivile tetala, tio la igogolu alele eme ge igo seselea. Mai eia vibalavati leme la vuliti, taritigi eme ge suli pepeho egiteu e tabarabaramu te la lotu. Mai eia toiti leme veia eme ge la mulugaluga, tio eme ge mamuga tataho egiteu te la lotu. Mai eia toiti leme veia eme ge pou te la vulovulo la mutelela, la igogolu taume ele eme ge igoa, eme ge sagege moli ovola.

⁹Taritigi amuto ge puhi tigi sesele egiteu e tabarabara mutou, amuto umala ge tau moli la marasala veia amuto ge puhi bulalahu moli egiteu. Amuto ge gima sesele la vulovulo ale kama kokora, amuto ge sau tola moli la vulovulo ale taritigi.

¹⁰Amuto ge vipuhi tigi, amuto ge vitogo baoli sesele le amutou, amuto ge vauru la isale tabarabara mutou.

¹¹Umala amuto ge tuha malulu te la igogolu te La Uru. Taritigi la kalulu mutou oilo ge tivura sesele, amuto ge igogolu tataho.

¹²Ale amuto pou tali la guluvi te Kraist ale eia ge vimahuli amutou, amuto ge pou la sagegela. Mai amuto ge poga la iligiligi te la isale Kraist, amuto ge vagari moli, kama ge gabutatala papai. Ale amuto ge kaka, kaka bibibi moli, umala piligi la vulovulo la kilaka.

¹³Mai isa tegatou ale te Kraist ge pou la savelela, amuto ge sulia. Mai egiteu la mosi ge guvi, amuto ge puli egiteu soio te la uluva la luma tamutou.