Rom 11:3-34 in Amanab

³ “Ainiyag, ehengel neana mo fli sihiafule elim kwaskofinig afa neana sis tuhlug faig sime bamboitifig. Asa ka mungu goba sa ehengel kam ogna tigifati.”

⁴ Afa God ehem haig esona? Ehe enaig og, “Ne mas nembe fwai mo fe mo, ka ati feg 7,000 el mas mwakwal God Balim mongkokni kwakwagini mo.”

⁵ Afa glauwa gafa gwenaig feg God mungu mungu elim esug kwaganigim afa kanog fwatig asa ehengel heafna el fig.

⁶ Sa hig, mango God ehengelni gafugagim onigin mo asa ehe ehengelim kanog fwatig, amo eba ehe ogna esmunagim kwaganim asa eseg. Afa sa ehengelni gafugag hefum kwaganigteba asa Godna esmunagim kwaganig eba esug feg.

⁷ Haigseg? Afa Ju el wasneig gafugafig ogna Godna nof la afsug apuke eba ehengel mas enaig fig mo. Afa ehengel nai mingnagim God kanog fwatig asa ehengel afsug el fig. Afa mungwali mingnag Ju el Godna unem patalfuiagim angug nihliagig.

⁸ Afa Godna ginof enaig esog; Afa God ehengelim esenigbi asa ehengelni onigig kinieskofegba asa glawaga ehengelni nofug mas nangui afa angug mas higi.

⁹ Afa Devit enaig elni mo enaig sihifeg og; Afa ehengel enaig onigi fig ka suialag el fig. Sa ma ehengelni buyis enaig pugufe tata bume lofug afa auwula lofug asa ehengel enanai yi apaiye afa mungwag susug flifi.

¹⁰ Asa ma ehengelni nofug kulufeskofegba asa ehengel mas nangui afa kinigni wahkig kahligim fifsafeagiaska.

¹¹ Afa ka nem pese enaig sahini fenig atiaho Ju elbi musiapugug fiahgigim asa ati apaiyeg? Amo, eba awai. Afa Ju el Kraisna mom masig fwatinibi asa God afwambanai elim lambugo. Afa God enaig esegba asa Ju el enaig esogog haigsegba hiau fligba kam mo awaienig.

¹² Afa Ju el enag amtakwalig esig afa enag maia esegba asa Godna suialag gawig mungwali bite nai elim pugunug. Afa Ju el tigefu apaiyeg afa enag maia esegba asa afwambanai el Godna suialag gawigim flig. Afa maia Ju el God nagum pese afugba big anwenafig Godna suialag gawig eba mungwanam kukag.

¹³ Afa ne afwambanai el sa hig. Ne anwenafig kaba kanog fwahag el asa God kam afwambanai el nagum ningihiag. Afa ka onigig enag gafugag eba goseg asa ka enam sifakalenag esegim.

¹⁴ Eba ka membeg kiafna mungwa usmunai enag gafugagim nangunim asa ambobug fegonig. Afa enaig minaba ehengel sa ma pese Godim yisgibi asa God mingnagim lambi.

¹⁵ Afa maia God Ju elim fwatigba eba sa bite nai el God i pese ugweag ahfeg. Afa maia God Ju elim pese lambiba eba ofenai melig pigieg el pese nofkenagag flig.

¹⁶ Afa el goflana amba koflag Godim faibi asa mungwali amba gafa eba Godna feg. Afa el li bagag Godim faigbi asa li kagag gafa eba Godna feg.

¹⁷ Afa Israel el ofenaiba aso nai oliv li fig afa afwambanai el ofenaiba sangwali nai oliv li. Afa sa God aso nai oliv li kagag tutogim asa sangwali nai oliv li kagag lambkugum enana sigag la tutufe fwatiba asa ehengel ehena suialag bug flig.

¹⁸ Afa enag aso nai li kagagim God sa tuto fwatigba nofeka enam pigi lambpaigo. Afa nofeka tonbusiagi. Afa ne mas li mogim kwegfui eba ena li mog nem kwegfug.

¹⁹ Afa ne enaig esoi me, “Afa God ehengelim tutog klaitigba asa kagel ehengelni sigag la afohieg.”

²⁰ Afa enaba nufunam. Afa eba ehengel mas olug onigig mo asa God enaig esenig. Afa ne olug onigigbi asa God ati nem tutufe fwatigba asa ne gwese afohie. Asa nofeka tonbusiagi afa sa ne embefi masa God nem gafa enaig esenifi.

²¹ Afa God Ju elim enaig esinig ofenaiba aso nai oliv li kagagim tuto klaitig. Afa atiaba ehe aso nai li enaig esenigbi afa sa haig sangwali nai oliv liba esenifi? Eba ehe gwenaig esenifi.

²² Afa sa ne enam onigim, Godba enaig feg aflafeg olug feg afa wasneig kwefihiageg el feg. Afa ambangel sa amtakwalig la apaiyeg eba ehengelim wasneigni kwefihianugefe afa nem eba aflafenfie. Atiaba ne heafna esmunagim kwaganig gwese kehla gohugba eba ne suialag gofufe. Afa ne enam masig fatinagba eba God nem gafa tuto klaitig.

²³ Afa atiaba tonbusug Ju el onigig waikefigbi eba God wasneig feg asa ehengelim pese lambinam asonai oliv li yi tutu fwatife asa ehe enaig esenifi.

²⁴ Afa ne afwambanai el ne ofenaiba sangwali nai oliv li kagag God nem aso nai oliv li yi tutufe fwatig enaba mango esug puguia mo eba asona alag ehe eseg. Afa Ju el ofenaiba aso nai oliv li kagag fig afa atiaba Ju el olug onigigbi asa eba God fwina sifakalegim ehengelim pese lambi tutufegba asa ehengel enag aso nai oliv li yi pese numwehe tutufifi.

²⁵ Kana nilite masa ne nimbeafgelni onigigim fingi fifi asa ka membeg ne ena mo sa autunam meagam sefu gofena sa ne enam anwenafi. Afa enag mo enaig esog Israel el nai yi mas olug wasneig wahkig gohunfi. Afa afwambanai el ambe saiye ehengelim pahsihianam maia ihlafeiba

²⁶ asa God mungwali Israel la nai elim pese lambigim eba Godna ginof enaig esog og; Afa enag kwefwag el Saion kembig la nai blonam, afa ehe Jekopna simbianigagna amtakwalig nihem huguflaitinifi.

²⁷ Afa God ehe enaig esog ka ehengel nai yi hwa mo kike sihi fwahanig asa ka ehengelni amtakwalig nihem huguflaitinife.

²⁸ Afa Ju el Godna suialag mom oksigim asa ehengel Godim angoluwag finig. Afa ehengel enaig esigbi asa nem afwambanai elim kwaganig. Afa ming ehengam eba God ati ehengelim kanog fwatina afa ehengelni simpim mo ati sihi fwahana asa Ju el eba heafna hihe fife.

²⁹ Afa ambanim God ati awamonagim afa heafna kigmog faig asa enaba God mas onigig waikefe.

³⁰ Afa autunam nengel afwambanai el ne Godna mom filafini. Afa glauwu Ju el maia Godna mom oksigbi asa God nengelim aflafenig.

³¹ Afa God nem enaig esinigbi asa glau Ju elim gafa gwenaig pugunig. Afa Ju el Godna mo filafini asa ma God ehengelim aflafeni.

³² Afa mungwali el mo filafigbi asa ehengel ofenaiba kalabus el fig. Afa God enam esegim asa eba ehe mungwali enaig elim aflafeg ogfunug.

³³ Oi, Godna suialag gawig eba fwina suialag nemug feg! Afa heafna suialag anwenag i afa suialag onigig i eba mungwanam fiageg! Afa el mas ehena meaganai onigigim yisiginagig asa ehe mas enam anwenafi God sa nihe eseageg.

³⁴ Afa God ginof enaig esog; Mas amban Godna onigigim anwenafi. Afa mas amban Godim anwena faig mo.

³ “Ainiyag, ehengel neana mo fi sihiaule elim kwaskofinig afa neana sis tuhlug faig sime bamboitifig. Eso ka mungo goba so ehengel kam ogna tigifati.”

⁴ Afa God ehem ahanaig esona? Ehe enaig og, “Ne mas nem hwai mo fe mo, ka ati feg 7,000 el mas mwakwal God Balim mongkokni kwakwagini mo.”

⁵ Afa yawa gaba gwenaig feg God mungo mungo elim isug kwaganigim afa kanog hwatig eso ehengel heafna el fig.

⁶ Sa hig, mang God ehengelni gafugagim onigin mo eso ehe ehengelim kanog hwatig, amo eba ehe ogna ismunagim kwaganim eso eseg. Afa so ehengelni gafugag hefum kwaganigteba eso Godna ismunagim kwaganig eba isug feg.

⁷ Ahanaig eseg? Afa Ju el kifutig gafugafig ogna Godna nof wa afsug opuko eba ehengel mas enaig fig mo. Afa ehengel nai mingnagim God kanog hwatig eso ehengel afsug el fig. Afa mungwali mingnag Ju el Godna unem pahlukuiagim angug pupuhiagig.

⁸ Afa Godna ginof enaig esog; Afa God ehengelim esenigbi eso ehengelni onigig kinieskofegba eso yawoga ehengelni nofug mas nangui afa angug mas higi.

⁹ Afa Devit enaig elni mo enaig sihifeg og; Afa ehengel enaig onigi fig ka lahlag el fig. Sa ma ehengelni buyis enaig puguf tata mime lofug afa auwula lofug eso ehengel enanai yi apaigo afa mungwag tautig fif.

¹⁰ Eso ma ehengelni nofug kigeskofegba eso ehengel mas nangui afa kinigni higeg kahligim fifsafeagiaska.

¹¹ Afa ka nem piske enaig sahini fenig ateaho Ju elbi musiapugug fiahgigim eso ati apaiyeg? Amo, eba awai. Afa Ju el Kraisna mom masig hwatinibi eso God afwambanai elim wambugo. Afa God enaig esegba eso Ju el enaig esogog ahnaig esegba hiau figba kam mo awaienig.

¹² Afa Ju el enag amtakwalig esig afa enag mahim esegba eso Godna lahlag gawig mungwali bite nai elim pugunug. Afa Ju el tigefu apaiyeg afa enag mahim esegba eso afwambanai el Godna lahlag gawigim fig. Afa mahim Ju el God nagum piske ahugba big anwanafig Godna lahlag gawig eba mungwanam kukag.

¹³ Afa ne afwambanai el so hig. Ne anwanafig kaba kanog wahiag el eso God kam afwambanai el nagum ningihiag. Afa ka onigig enag gafugag eba goseg eso ka enam sifakalenag esegim.

¹⁴ Eba ka membeg kiafna mungo musunai enag gafugagim nangunim eso ambobug fegonig. Afa enaig minaba ehengel so ma piske Godum yisgibi eso God mingnagim wambu.

¹⁵ Afa mahim God Ju elim hwatigba eba so bite nai el God i piske lahlafeag ahfeg. Afa mahim God Ju elim piske wambuiba eba ofenai melig pigieg el piske nofkenagag fig.

¹⁶ Afa el kwafana amba kufa Godum faibi eso mungwali amba gaba eba Godna feg. Afa el li bigag Godum faigbi eso li kigag gaba eba Godna feg.

¹⁷ Afa Israel el ofenaiba aso nai oliv li fig afa afwambanai el ofenaiba sangwali nai oliv li. Afa so God aso nai oliv li kigag tutogum eso sangwali nai oliv li kigag wambukugum enana sigag wa tutufe hwatiba eso ehengel ehena lahlag bug fig.

¹⁸ Afa enag aso nai li kigagim God so tutohia hwatigba nofeka enam pigi wambwaigo. Afa nofeka tutonbusiagi. Afa ne mas li mogim kweagfui eba ena li mog nem kwegfug.

¹⁹ Afa ne enaig esoi me, “Afa God ehengelim tutog aitigba eso kagel ehengelni sigag wa agfohieg.”

²⁰ Afa enaba inim. Afa eba ehengel mas olug onigig mo eso God enaig esenig. Afa ne olug onigigbi eso God ati nem tutufe hwatigba eso ne gwese agfohie. Eso nofeka tutonbusiagi afa so na embefi masa God nem gaba enaig esenif.

²¹ Afa God Ju elim enaig esinig ofenaiba aso nai oliv li kigagim tutohia aitig. Afa ateamba ehe aso nai li enaig esenigbi afa so ahanaig sangwali nai oliv liba esenif? Eba ehe gwenaig esenif.

²² Afa so na enam onigim, Godba enaig feg afafeg olug feg afa kifutig kwefihiageg el feg. Afa amangel so amtakwalig wa apaiyeg eba ehengelim kifutigni kwefihianugef afa nem eba afafenif. Ateaba ne heafna ismunagim kwaganig gwese kehla gohugba eba ne lahlag gofuf. Afa ne enam masig fatinagba eba God nem gaba tutohia aitig.

²³ Afa ateamba tutonbusug Ju el onigig wahigifigbi eba God kifutig feg eso ehengelim piske wambinam asonai oliv li yi tutu hwatif eso ehe enaig esenif.

²⁴ Afa ne afwambanai el ne ofenaiba sangwali nai oliv li kigag God nem aso nai oliv li yi tutufe hwatig enaba mang isug puguia mo eba asona awag ehe eseg. Afa Ju el ofenaiba aso nai oliv li kigag fig afa ateamba Ju el olug onigigbi eso eba God hugna sifakalegim ehengelim piske wambu tutufegba eso ehengel enag aso nai oliv li yi piske numwehe tutufif.

²⁵ Kana nilite masa ne nimbeafgelni onigigim fingi fif eso ka membeg ne ena mo so autunam meagam sahu gofena so na enam anwanafi. Afa enag mo enaig esog Israel el nai yi mas olug kifutig higeg gohunif. Afa afwambanai el ambugog saho ehengelim pahsihianam mahim yuhwafeiba

²⁶ eso God mungwali Israel wa nai elim piske wambugum eba Godna ginof enaig esog og; Afa enag kwegfwag el Saion kimbig wa nai bonam, afa ehe Jekopna simbianigagna amtakwalig nihem hugufatinif.

²⁷ Afa God ehe enaig esog ka ehengel nai yi ohuna mo kike sihi wahianig eso ka ehengelni amtakwalig nihem hugufatinif.

²⁸ Afa Ju el Godna lahlag mom kusigim eso ehengel Godum angoluwag finig. Afa ehengel enaig esigbi eso nem afwambanai elim kwaganig. Afa ming ehengam eba God ati ehengelim kanog hwatina afa ehengelni simpim mo ati sihi wahiana eso Ju el eba heafna hihe fif.

²⁹ Afa amanim God ati awamonagim afa heafna kigmog faig eso enaba God mas onigig wahigefe.

³⁰ Afa autunam nengel afwambanai el ne Godna mom flafuni. Afa yawu Ju el mahim Godna mom kusigbi eso God nengelim afafenig.

³¹ Afa God nem enaig esinigbi eso yawo Ju elim gaba gwenaig pugunig. Afa Ju el Godna mo flafuni eso ma God ehengelim afafeni.

³² Afa mungwali el mo flafugbi eso ehengel ofenaiba kalabus el fig. Afa God enam esegim eso eba ehe mungwali enaig elim afafeg wagfunug.

³³ Oi, Godna lahlag gawig eba hugna lahlag nemug feg! Afa heafna lahlag anwanag i afa lahlag onigig i eba mungwanam fiageg! Afa el mas ehena meaganai onigigim yisiginagig eso ehe mas enam anwanafi God so nihe eseageg.

³⁴ Afa God ginof enaig esog; Mas aman Godna onigigim anwanafi. Afa mas aman Godum anwana faig mo.