4 Jesos Christ mega ogi ojiton kidji poni abadanigin Coda8inni Inakonige8inan. Midac kakina a8iagon ka teb8etagodjin, mi ini8eni8an Kije Manido ka k8aiak8abamadjin.
5 Igi8e ka k8ag8edjito8adj kidji k8aiak8abamigo8adjin Kije Manidon e nosoneamo8adjin Coda8inni Inakonige8inan, mikomagani8i8ag Mois odojibiiganikag. Ogi ojibian dac oo8eni: “Aa8e ka nosoneagin adigotc enakonigemaganigin inakonige8inan, kada odji pimadizi ii.”
6 Igi8e dac ka teb8eta8a8adjin Kije Manidon kidji odji k8aiak8abamigo8adjin, okikendana8a e teb8emaganig oo8e ka ojibiigadenigobanen: “Ka8in inendakegon: A8enen ke ijapan 8ak8ig, kidji a8i nd8e8emadjin kidji pi nisada8endjin ini8e kagi ikidondjin Kije Manidon kidji pidjinija8andjin?
7 Ka8in kek8an inendakegon: A8enen ke iji najada8epan taji ka tendjin ka nibondjin, kidji a8i nd8e8emadjin kidji pi abidjibandjin nibo8inikag ini8e kagi ikidondjin Kije Manidon kidji pidjinija8andjin?”
8 Misa dac oo8eni ka ojibiigadenig 8ina8a odji: “Kitci peconag8ani kina8akag Kije Manido odikido8in, kidoni8akag acitc kidei8akag iji tag8ani.” Kije Manido dac odikido8in, mi oo ka paba tibadjimo8ag, e ikido8ag panima a8iagog ki teb8eta8a8adjin Kije Manidon.
9 Kicpin dac 8idamageieg “Mi aa8e Jesos ka Tibendjigedj,” acitc kicpin teb8etameg kidei8akag Kije Manido egi abidjibaadjin Jesosan nibo8inikag, kiga ag8acimigo8a Kije Manido.
10 A8iag mega odeikag iji teb8etag, mi ke odji k8aiak8abamigodjin Kije Manidon. A8iag dac 8idamagedj “Mi aa Jesos ka Tibendjigedj,” mi ke odji ag8acimigodjin Kije Manidon.
11 Mazinadeni mega Kije Manido Omazinaiganikag: “A8enenigotc ke teb8eta8ag8enin, ka8in 8ikad ‘ceck8at niteb8eta8a’ kada inendasi.”
12 Ka8in dac pakan apitendagozisi8ag Coda8innig acitc ega ka Coda8inni8i8adj. Ka Tibendjigedj mega kakina ini otibeniman, acitc okitci ca8eniman kakina a8ian ka pagosenimigodjin kidji 8idoka8adjin.
13 Mi mega oo ka ojibiigadenig Kije Manido Omazinaiganikag: “A8enenigotc ka pagosenimadjin ka Tibendjigendjin kidji 8idokagodjin, kada ag8acimagani8i.”
14 Kicpin dac a8iagog ega maci teb8eta8a8adjin Kije Manidon, adi dac kegi odji pagosenima8adjin kidji 8idokago8adjin? Kicpin ega ki nodage8adj e mikomagani8indjin, adi dac kegi odji teb8eta8a8adjin? Kicpin ega a8ian ki pi 8idamago8adjin Kije Manidon odikido8ini, adi dac kegi odji nodage8adj?
