10 Uni, ra u nurnur namin balam, o God i watung ui lena u tokodos umatano. Ma, ra u upuaso i nam anum a wasiso lena, o Iesu i a Labino, o God in ulaun ui.
11 Elar nami ra di sa tumus tari una Buk Tabu lenri, “Osi ra in nurnur uni, ken maimai.”
12 Ke senene torom a taro Juda ma torom a taro gisen kai: Ara Labino kut anundat rop. Ma in watung udan a taro rop ra det wararing toromi.
13 Uni a Buk Tabu i watungi lena, “Det rop ra det wararing torom a Labino, in ulaun pas det.”
14 Ikut, ra ka det nurnur un a Labino, det in wararing pepetlai toromi? Ra ka det longoro tar tu wasiso uni, det in nurnur pepetlai uni? Ra kataio i inanos det, det in longoro i pepetlai?
15 Ra kataio i tulu a kum tene warawai, det in nan pepetlai nama wasiso? Elar nami ra di sa tumus tari una Buk Tabu lena, “A inawan pat anundet ra det wanpat nama Wakak na Wasiso, i wakak doko.”
16 Ikut awu sur a taro rop det mur a Wakak na Wasiso. Elar nami ra a poropet Aisaia i sa watung tari lena, “Labino, osi i nurnur una numet a wasiso? Katutaio.”
17 I mo ra dat nurnur, uni dat longoro a Wakak na Wasiso. A wasiso ra det longoro i, a wasiso ut anun o Karisito.
