17 Ga ma gel nagmad ko pi cham; u fithik’ e t’ufeg rom ngomad e kam gel nagmad riy,
18 A SOMOL, i gur e ka mmel’eg en nge yororiymad; gur, fare Got Nthothup nu Israel, e mu pi’ ngomad e pilung romad.
19 Kakrom e mu dag u daken e thin rom ngak e pi tapigpig rom nib yul’yul’ ni lungum, “Ku gu te’eliyawnag ba salthaw nib gilbugwan, ku gu pi’ e chiya’ ko pilung ngak be’ ni gag e ku gu mel’eg u fithik’ e girdi’.
20 Ku gu pilungnag David ni tapigpig rog ku gu gapgepnag ko gapgep ni thothup.
21 Gelngig e bay i par rok ni gubin ngiyal’, gelngig e bayi pi’ gelngin nge gel.
22 Pi to’ogor rok e ri dabiyag rorad ni ngar ban niged, pi’in kireb e dabiyag ni ni ngar gelgad ngak.
23 Bay gu pirdi’iy e pi to’ogor rok u p’eowchen, mu gu thang e pogofan rok urngin e pi’in yad be fanenikay.
24 Bay gu t’ufeg mu gu yul’yul’ ngak; bay gu tay ngi i gel ni gubin ngiyal’.
25 Bay gu ga’nag e gin nge gagiyeg riy ni tabab ko day’ ni Mediterranean nge yan i thang ko lul’ ni Eufrates.
26 Bayi ga’ar ngog, ‘I gur e chitamag nge Got rog; gur e yoror nge ta’ayuw rog.’
27 Bay gu tay ni ir e bin nganni’ i fakag, me ir e th’abi ga’ u fithik’ urngin e pilung.
28 Gubin ngiyal’ ni bay gu tay u gil’ e n’en kug micheg ngak, ma m’ag ni kug ngongliy u thilmow e bayi par ni dariy n’umngin nap’an.
29 Pi’in owchen e gubin ngiyal’ ni yad e bay ur pilunggad; gagiyeg rok e bayi par ndabi m’ay ni bod lanelang ni bay i par.
30 “Machane fa’anra dabi fol e pi’in owchen ko motochiyel rog, ma darir ngongolgad nrogon ni be yog e pi motochiyel rog,
31 miyad pi’ keru’rad ko fonow ni gu be tay ngorad, ma darir folgad ko tin kugog ngorad ni ngar rin’ed,
32 ma aram e bay gu gechig nagrad ni bochan e denen rorad; bay gu pagrad ngar gafgowgad ni bochan e kireb rorad.
33 Machane David e bay i par nib t’uf rog, dariy bangiyal’ ni gu ra pag e tin ku gu micheg ngak.
34 Dab gu th’ab e m’ag ni ku gu ngongliy u thilmow, ara gu thilyeg ta’abbug fapi thin ni ku gu micheg ngak.
35 “Ri ta’ab yay ni kug micheg nga fithingag nib thothup ma bay i par riy ni aram rogon, ya ri dab gu lifith l’ugunag ngak David bi’id!
36 Gubin ngiyal’ ni bayi par ni bay e gird’ ni owchen, ma bay ug matanagiy gil’ilungun u n’umngin nap’an ni bay e yal’ ni be mat ram’en.
37 Bay i par ndabi m’ay ni bod e pul, bayi par nib mudugil u n’umngin nap’an ni be par lanelang.”
38 Machane ka mu damumuw ngak fare pilung ni gur e mu mel’eg; ya kamn’ag ni kam pi’ keru’um ngak.
39 Kam thang e m’ag ni mu ngongliy u thilmew fare tapigpig rom, ma ka m’on e te’eliyaw ko pilung rok nga marungdu’.
40 Kam buthug e yoror nib liyeg e binaw rok, pi yoror rok ni fan ko mael e kam digey nib puth.
41 Urngin e girdi’ ni be yib u to’oben nge yan e yad be iring e chugum rok; ma urngin e pi’in yad bbuguliyoror e yad be moning ngak.
42 Kam gagiyegnag e pi to’ogor rok kar gelgad ngak; ka mu gagiyeg nagrad ni yad gubin kar fefelan’gad.
43 Kam m’aynag fan talin e cham rok, kam pag ke waer ko mael.
44 Kam chuweg e sog ko pilung u pa’ ma tagil’ ni tagil’ e pilung e kam thikiy nga but’.
45 Kam pilibthirnag ndawori taw nga nap’an, ke par nike m’ay fan.
46 SOMOL, uw n’umngin nap’an ni ngam mithagem, dariy n’umngin nap’an? Uw n’umngin nap’an ni nge yik’ e damumuw rom ni bod e nifiy?
47 Mu leamnag feni ngoch nap’an e yafos rog; mu leamnag ni mu sunumeg urngin e girdi’ nib mudugil ni yad ra yim’!
48 I mini’ e ra par ndabi yim’? Uw rogon ni nge ayuweg e girdi’ ir ni nge dabki yan nga low?
49 Somol, bu uw fapi mich ko runguy rom ni um dag kakrom? Bu uw fapi thin ni mmicheg ngak David?
