1 A SOMOL, gubin ngiyal’ ni bay u gu tangnag e t’ufeg rom ni dabimus; bay ug weliy murung’agen fanam yul’yul’ ni dab gu tal bi’id.
2 Gu manang ni t’ufeg rom e bay i par ndariy n’umngin nap’an, ma fanam yul’yul’ e dabi chuw ni bod lanelang.
3 Ke lungum, “Kug ngongliy e m’ag u thilmow fare mo’on ni gag e gu mel’eg; kug micheg bbugithin ngak e tapigpig rog i David nike lungug,
4 ‘Pi’in ni owchem e bay ur pilunggad ni gubin ngiyal’; gagiyeg ni bay um tay e bay ug ayuwegnem riy ndariy n’umngin nap’an.’”
5 A SOMOL, piyu tharmiy e yad be tangnag e pi manigil ni ga be rin’ yad be tangnag fanam yul’yul’ i gur SOMOL.
6 SOMOL, dariy be’ u tharmiy ni bod gur; dariy reb e pi chon e tharmiy ni ta’reb rogon ngom.
7 Ba ga’ madgum u lan e mu’ulung ko pi thothup, yad gubin ni yad ba sak’iy ni ka ra ngat’gad ngom.
8 SOMOL ni Got ni Gubin ma Rayag Rok, dariy be’ ni bod fanam gel; A SOMOL, ga ba yul’yul’ u fithik’ urngin ban’en.
9 Gur e ga be gagiyegnag gelngin e day; ga ma mocha’nag e n’ew riy nike puw.
10 I Rahab nib gel gelngin e kam pirdi’iy ke yim’; gelngim nib gel e ke gel nigem ngak e pi to’ogor rom.
11 Fayleng e mmil suwon ngom, ma ku er rogon e tharmiy; gur e mu sunumiy e fayleng nge urngin ban’en ni bay riy;
12 gur e mu tay e lel’och nge yimuch; Burey ni Tabor nge Burey ni Hermon e yow be tang nigem u fithik’ e felfelan’.
13 Ri gab gel! Ri ba ga’ gelngim!
14 Gagiyeg rom e ntoy nga daken e mat’aw nge yal’uw; t’ufeg nge yul’yul’ e be m’ug ko urngin e ngongol rom.
15 Ba felfelan’ e pi’in yad ma liyor ngom ko pi tang ni yad ma yin’, ni yad be par u fithik’ ram’en fanam gol.
16 Polo’ e rran ni yad ba felfelan’ ni bocham ma yad be pining e sorok ngom nga fanam fel’.
17 Ga ma gel nagmad ko pi cham; u fithik’ e t’ufeg rom ngomad e kam gel nagmad riy,
18 A SOMOL, i gur e ka mmel’eg en nge yororiymad; gur, fare Got Nthothup nu Israel, e mu pi’ ngomad e pilung romad.
19 Kakrom e mu dag u daken e thin rom ngak e pi tapigpig rom nib yul’yul’ ni lungum, “Ku gu te’eliyawnag ba salthaw nib gilbugwan, ku gu pi’ e chiya’ ko pilung ngak be’ ni gag e ku gu mel’eg u fithik’ e girdi’.
20 Ku gu pilungnag David ni tapigpig rog ku gu gapgepnag ko gapgep ni thothup.
21 Gelngig e bay i par rok ni gubin ngiyal’, gelngig e bayi pi’ gelngin nge gel.
22 Pi to’ogor rok e ri dabiyag rorad ni ngar ban niged, pi’in kireb e dabiyag ni ni ngar gelgad ngak.
23 Bay gu pirdi’iy e pi to’ogor rok u p’eowchen, mu gu thang e pogofan rok urngin e pi’in yad be fanenikay.
24 Bay gu t’ufeg mu gu yul’yul’ ngak; bay gu tay ngi i gel ni gubin ngiyal’.
25 Bay gu ga’nag e gin nge gagiyeg riy ni tabab ko day’ ni Mediterranean nge yan i thang ko lul’ ni Eufrates.
26 Bayi ga’ar ngog, ‘I gur e chitamag nge Got rog; gur e yoror nge ta’ayuw rog.’
27 Bay gu tay ni ir e bin nganni’ i fakag, me ir e th’abi ga’ u fithik’ urngin e pilung.
28 Gubin ngiyal’ ni bay gu tay u gil’ e n’en kug micheg ngak, ma m’ag ni kug ngongliy u thilmow e bayi par ni dariy n’umngin nap’an.
29 Pi’in owchen e gubin ngiyal’ ni yad e bay ur pilunggad; gagiyeg rok e bayi par ndabi m’ay ni bod lanelang ni bay i par.
30 “Machane fa’anra dabi fol e pi’in owchen ko motochiyel rog, ma darir ngongolgad nrogon ni be yog e pi motochiyel rog,
