6 O Kari Biya, ni Yawe Sokel Garagar, yam agarkiwer se ani dagulek se nika kariimet ningo me nongomang ikuwurokko; nuna ni ko ko nongomang pempem niawoso se me dolomonko, O Israel ko Kaem.
7 Ani ni la karo kisisam, buta se ani agarki maguwu gilingisan, se ani dolara ninguru aga iramuram.
8 Aninga gue suan se aga launuria alo mu ani nononga bo iwita me agarkasan;
9 mu awuk, aninga angamang motam mu nika temple ko tawun biya kueso ale tama iwita kani lagoso, kariimet nika balu maguwusan mu ani agotala aga balu maguwusan.
10 Tom ani aimi karogo kapasam ale inang kaola ko munan karosam mu kariimet aga balu maguwusan.
11 Ani angamang batagoso se aimi karur tugusam ale amone guari pagoso, mu nuna aninga gusirsan.
12 Kariimet lage te ilu biguwusan ale aninga ko munakasan, se yu aora nana ale ngualara ko kari mu wur memek ani ago ko ilusan.
13 Bare O Yawe, aninga guranek nikate betesam. Ni ani ago ko ninguru kuesam, ale tom ni keta ko ikiwasam mu te aninga guranek koma aisuko; ni aga sangaru toko den kalo beterem mu te aga sangaru toko.
14 Ni aninga tagi bataguru to se ani lom gege ningi me sarenga namarikko; ni aninga bitaru se kager kari memek me aga maguwumonko.
15 Ni aga sangaru se lom me aga tagirokko; ni aga sangaru se yu du biya ningi me sarengik, ale mutim ningi me kua namarikko.
16 O Yawe, agiring ilupko, nika kua aisa biya mu ko ningo te aga sangaruko; nika gemang lila ningo mu te kema gurugu aisuko.
17 Biring gurugu nika ura kari me tuiko; ani ikup biya ningi kaperem se ni tairate tai aga sangaruko.
18 Ni aninga te tairate tair ale aga sangaruko; kager kari memek nuguting te aga bataguru toko.
19 Kari aninga balu maguwusan mu ni maingkala nunga iki saperem; aninga aip karogo kapasan ale dolara aisisan mu ni nunga ikiem.
20 Bala se ikia suen la beteman mu aninga angamang motam batogam se aga sokel menaram; ani kariimet bo aga sanguk ale den ningo aisuokko i maem, bare mena.
21 Nuna inang memek wore naikko aisiman; ale yu ko kuerem mu, yu memek mu aisiman.
22 Aninga angamang mu, nunga amilmil inang bibiya ko tom mu geraguk ale nononga tom memek iwita nunga taliparuk se dagulamonko.
23 Ni nunga nomotam tirom awur se sor me arigimonko; nunga nosokel menawur se ikup gimon ale tara tara la lagamonko.
24 Nika gemang memek nungumik kuali bitarko; se nika gemang magara mu nunga maguwurok se mena namamonko.
25 Se nunga kawam digo mu kariimet bo me ta ningi bagarukko; nunga wonong tuagu mu sirsir pagukko.
26 Mu awuk, kariimet saki nunga memek koma nungarem mu agotala nunga bita maguwusan; ni yaman nungarem se lot gawir giman mu nunga den siaman balsan ale ikup nungarsan.
27 Ni nunga memek koma ikup ko ikup nungaruko; ale nunga bitar se nika kariimet ningo nunga por ningi me utu kapamonko.
28 Nunga nunup marak ningo pempem bagara ko batoga ningi mu siwu saparko; ale nunga nunup mu kariimet diram ningo nunga nunup karogo me bitarko.
29 Bare O Kaem, ani ikup yaman tawun biya giem; ni aninga bataguru to ale aga bitaruko.
