3 Mu tining e sarey rom nge tow ni fen e mael nga daken e pi’in yad be tulufeg. Mmicheg ni ga ra ayuwegneg.
4 Mang e yigi waer me ma’fan e pi’in yad be guy rogon ni ngar thanged e pogofan rog! Mang e yugu ra sulod nike wagagey lanin’rad yad e pi’in yad be makath nigeg!
5 Mang e ra boded e chabung ni be changegnag e nifeng, nnap’an ni be tulufrad fare engel rok SOMOL!
6 Mang e yigi lumor me sisirgig kanawo’rad ko ngiyal’ ni be toyrad fare engel rok SOMOL!
7 Dariy tapgin ni karted e wup ni nggu aw ngay ma kar kired ba low nib to’ar ni nggu mul ngay.
8 Machane riya’ e bay i aw ngorad u m’on ni ngar nanged; bay ra awgad ko wup rorad ni aram e ke aw e riya’ ngorad!
9 Ma aram e bayi felan’ug ni bochan SOMOL; Bay gu felfelan’ ni bochan e ke aywegeg.
10 Bayi lungug ngak SOMOL u polo’ i lanin’ug, “Dakuriy be’ ni bod gur. Ga ma yororiy e me’waer u pa’ e yargal, nge ba gafgow u pa’ e en ma gafgownag.”
11 Be welthin e girdi’ ni kireb nib togopluw ngog, ma pi kireb ni yad be yog ni kug rin’ e dagnang murung’agen.
12 Kireb e yad be sulweg ngog ni puluwon e manigil, ma ri ma mulan’ug.
13 Machane, gag e nap’an ni yad bm’ar, mu gu chuw nga madan e kirban’; mu gu pag e abich; Mu gu meybil ni kugup’ owcheg nga but’,
14 ni bod nu gu be meybil ni fan ngak ba fager fa be’ ni gamow. Mu gu wan ni kugup’ owcheg nga but’ ko kireban’, ni gowa be’ ni be yornag e chitiningin.
15 Machane nap’an ni l’ag e oloboch ngog, ma go’ ra felan’gad miyad mu’ulung ngu’ur minmingad ngog; be pirdi’iyeg e pi’in dagnang owcharad ni dariy e toffan.
