14 ni bod nu gu be meybil ni fan ngak ba fager fa be’ ni gamow. Mu gu wan ni kugup’ owcheg nga but’ ko kireban’, ni gowa be’ ni be yornag e chitiningin.
15 Machane nap’an ni l’ag e oloboch ngog, ma go’ ra felan’gad miyad mu’ulung ngu’ur minmingad ngog; be pirdi’iyeg e pi’in dagnang owcharad ni dariy e toffan.
16 Ni bod e pi’in yad ma moningnag be’ nib mugutgut, yad be gatfeg owcharad ngog ni yad be fananikayeg.
17 SOMOL, bu uw n’umngin nap’an ni kemus ni ngu’um sap? Mu lageg ko cham rorad mu ayuweg e fan rog u pa’ e pi layon ney!
18 Ma aram e bay gu pining e magaer ngom u lane mu’ulung rok pi girdi’em; Bay gu pining e sorok ngom u p’eowcherad ni yad gubin.
19 Dab mu pag e pi to’ogor rog ni yad bogi sasalap l’ugun, ngar giriggad ni ku gu waer. Dab mu pag e pi’in yad be fananikayeg ni dariy tapgin ngar felan’gad ni ku gu gafgow.
20 Darir ma welthingad nib munguy; yad ma tunguy gubin mit e thin ni sasalap ni murung’agen e pi’in bt’uf e gapas rorad.
