4 Mu awuk, Yawe ko den mu diram se nunguning, se ura suen la gomang ningi nunguning te beteso.
5 Nu munan ningo suen la ko kueso, ale anapeya ningo diram mu ko kueso; nu pempem la ali imi ko kariimet suen la nunga kueso.
6 Yawe den te balam se melmasak suen la kualala mu aratu muruwuman, worem se sige se baras mu taiti gomang te arataman.
7 Nu kari bo yu kani ningi utu betera iwita, gagi yu giam bolala awuram, ale ko tom tom te awu awu ago namaram; ale nu gagi ko nukum mu ali bowa ko du biya beteram.
8 Buta se ali imi te kariimet suen la noko ko la nguanga se kua tui se nu bowa ningi la bagaralko!
9 Mu awuk, nu den te balam se ali imi aratam; ale balam uwutata gek am aratu sanamaram.
10 Yawe ali ewere ko kariimet nunga ikia bitawasan mu batagarso ale parusuwuso se kirker namoso; nuna ura bo betemonko ikia kalomon, bare me ta betemonko.
11 Bare tom Yawe mel bo bitirukko ikia kaloso, mu uwutata arataso; noko gomang motam mu pempem butata ani lagoso.
12 Sor aguwaya mu nuna nunga Kaem mu Yawe, mu amilmilamonko; sor umu ko kariimet nu noko ma nunga balam, mu amilmilamonko.
13 Yawe duruk wonong te daigam baga se, loagoso se aliti kaposo se kariimet suen la nungarkoso;
14 nu ko sor te bagoso mu te baga se, kariimet ali lilim la imi te bagasan mu nungarkoso;
15 nuguta kariimet nongomang motam nungam, buta se nuna aguwaya betesan mu nu ko iki saposo.
16 King bo noko kager kari suen biya mu te la numi me sangarso; agi kager kari bo ta kota ko sokel mu te me numi bataguru taso, mena.
17 Uwutatala, kager te nanimi sangaru ta mu nanga horse ko sokel te la me aniso; nanga horse mu sokel tamatama wore me nanga sangukko.
18 Bare Yawe kariimet nu ko nguanga se nu bowa ningi la bagasan mu nunga sinar taso; awiriya noko kua nangara kumik menara mena mu te la ira sanamasan,
