7 Ma aram me yib e durru’ nge rur e fayleng; ma enggin e pi burey e rur ma be dada’, ni bochan e ke damumuw Got.
8 Yib e ath u lan p’ethngun nga but’, ma nifiy ni be daramram nge coal ni be yik e yib u l’ugun nga but’.
9 Me gochthiy e tharmiy nge mab me yib riy nga but’ ni bay bang i manileng nib limor u tan rifrifen ay.
10 Me changeg nib papey ni bay u daken fare gamanman ni bay pon; i milekag u daken pon e nifeng.
11 Me upnguy ir ko lumor; ma ke liyeg e manileng nib dub’ag, nib sug ko ran.
12 Pi malang ni be yik nge ra’en e nifiy ni be matmat e yib ko uluch u p’eowchen nge kuruf e pi manileng nib lumor nga barba’.
13 Ma aram me chob SOMOL ni dirra’ u lanelang; ma laman fa en Th’abi Tolang e nni rung’ag.
14 Me pag e pi gan e gat’ing rok nge wereg e pi to’ogor rok; ra’en e uluch ni be matmat e tulufrad ngay.
15 T’ay e regur e ke m’ug, ma pi enggin e fayleng e ke chuw e upong u daken, u nap’an e mu puwan’ ko pi to’ogor rom, SOMOL, ma ga tolul ngorad u fithik’ e damumuw.
16 Me lumel SOMOL u lang nga but’ nge koleg; nge girngiyeg ngalang u fithik’ e ran nib to’ar.
17 I aywegeg u pa’ e pi to’ogor rog nib gel gelingrad ngu pa’ gubin e pi’in dabrad dakenag— ni rib gel gelingrad ngog.
18 Nap’an ni ug moy u fithik’ e mo’maw’, miyad cham ngog, machane me yororiyeg SOMOL.
19 Me ayuwegneg ngug chuw u fithik’ e riya’; i ayuwegneg ni bochan e ba felan’ ngog.
20 Ma tow’ath nigeg SOMOL ni bochan e gu ma rin’ e tin ni bfel’; mma fal’eg wa’athag ni bochan e bfel’ e rog.
21 Gu ma fol ko motochiyel rok SOMOL; dawor gu pi’ keru’ug ko Got rog.
22 Gu ma tay u gil’ gubin e motochiyel rok; ma dagur togopluw ko tin ke ta’chiylen.
23 Manang ndariy e kireb rog, ma dagur ma rin’ e kireb.
24 Ere ma tow’ath nigeg ni bochan e gu ma rin’ e n’en ni bfel’, ma bochan e manang ni bfel’ e rog.
25 A SOMOL, ga ba yul’yul’ ngak e pi’in yad ba yul’yul’ ngom; polo’ fanam fel’ ko pi’in dariy thibngirad.
26 Ga ba machalbog ko pi’in yad bmachalbog, machane ga ma dumpamam ko pi’in yad ba kireb.
27 Ga ma ayuweg e pi’in yad ba sobut’an’, machane ga ma sobut’nag e pi’in ba tolangan’rad.
28 A SOMOL, ga ma pi’ e tamilang ngog; ma ga ma chuweg e lumor rog.
29 Ga ma pi’ gelngig ni nggu cham ko pi to’ogor rog nge gelngig ni nggu buthug e yoror rorad.
30 Re Got ney — e rib th’abi fel’ e ngongol rok! Thin rok e rib pagan’uy ngay! Ir e bod bangi shield ngak gubin e pi’in nma gay e ayuw rok ni nge yororiyrad.
31 I SOMOL, ni kemus ni ir e Got; kemus ni Got e yoror rodad.
32 Ir fare Got nma gel nigeg, nma yal’uweg kanawo’eg.
33 I teg ni gu bod ba deer nib l’agl’ag rifrifen ay; me teg ndab gu thay u p’ebugul e burey.
34 Ma fil rogon e mael ngog, ya nge yag ni gu cham ko bin th’abi gel e gat’ing.
35 A SOMOL, ga ma yororiyeg ma ga ma ayuwegneg; ayuw rom e ke gilnag buguwag, ma gelngim e ke teg ndariy ban’en nike buch rog.
36 Ka mu ayuwegneg ni de yag nni koleg, ma dawor gu dol’ bingyal’.
37 Gu be tuluf e pi to’ogor rog ngu’ug kolrad; da gur tal nge taw ko ngiyal’ ni kug thangrad.
38 Kug cham ngorad nga but’, ni dakiyag ni ngar suwongad; kar pired u but’ ni yad ba waer u puluwog.
39 Gur e ga ma pi’ gelngig ko mael nggu gel ngak e pi to’ogor rog.
40 Ga ma tuluf e pi to’ogor rog kar milgad rog; gu be thang mit e pi’in yad be fananikayeg.
41 Yad be yornag e ayuw, machane dariy be’ nra ayuwegrad; yad be pining SOMOL, machane dar fulweg lungurad.
42 Kug parsiyrad, kar ngal’gad ni ab nra thoyrad e nifeng miyad chuw. Gu be yot’yot’rad ni bod e bar u lan yupa’ i kanawo’.
43 Kam ayuwegneg u pa’ e girdi’ ni tatogopluw, kam teg ni nggu gagiyegnag e pi nam; ni bogni’ ni dagnangrad e kar pired e chiney nga tan pa’ag.
44 Girdi’ u boch e nam e yad be siro’ ngog; nap’an ni yad ra rung’ag lamag, miyad fol riy.
45 Ke m’ay e athamgil u lanin’rad karbad u fon e yoror rorad nga wean ni yad be t’on.
46 I SOMOL e bay nib fos! Ke sorok e en ni ta’ayuw rog. Mu weliyed murung’agen feni sorok fare Got ni ayuwegneg.
47 Ma pi’ gelngig nggu gel ngak e pi to’ogor rog; ke tay e pi nam nga tan pa’ag
48 ma ke ayuwegneg u pa’ e pi to’ogor rog. A SOMOL, ga ma pi’ gelngig nggu gel ngak e pi to’ogor rog ma ga ma yororiyeg u pa’ e girdi’ ni tacham.
49 Ere gu be pining e sorok ngom u fithik’ e pi nam. Ni gu be tangnag feni sorom.
50 Got e ma pi’ gelngin e pilung rok nge gel; ma dag e t’ufeg ni dabimus ngak e en nike mel’eg, nge ngak David nge pi’in owchen ndariy n’umngin nap’an.
