43 Kam ayuwegneg u pa’ e girdi’ ni tatogopluw, kam teg ni nggu gagiyegnag e pi nam; ni bogni’ ni dagnangrad e kar pired e chiney nga tan pa’ag.
44 Girdi’ u boch e nam e yad be siro’ ngog; nap’an ni yad ra rung’ag lamag, miyad fol riy.
45 Ke m’ay e athamgil u lanin’rad karbad u fon e yoror rorad nga wean ni yad be t’on.
46 I SOMOL e bay nib fos! Ke sorok e en ni ta’ayuw rog. Mu weliyed murung’agen feni sorok fare Got ni ayuwegneg.
47 Ma pi’ gelngig nggu gel ngak e pi to’ogor rog; ke tay e pi nam nga tan pa’ag
