6 Tjiṉṯu paluṟu pakalpai ilkaṟi kampa kakaraṟanguṟu, munu ilkaṟingka kaṯakutjara ankula ma-tjarpapai ilkaṟi kampa wiluṟara. Munu paluṟu manta winkingka kampapai wiltjangka nyinanytjaku. Uwa, mulapa ilkaṟingku tjiṉṯungku munu Godaku tjukurtu kuḻu nganaṉala Godanya nintilpai.
7 Panya Godaku tjukurpa puḻka mulapa, munu nganaṉa uparingkunyangka tjukurpa paluṟu nganaṉanya piṟuku kuṉpulpai. Godalu tjukaṟurungku wangkapai, kala uti palumpa tjukurku puḻkaṟa mulamularingama. Panya palumpa tjukurtu aṉangu ngurpa nyinanyangka nintipukaringkunytjaku nintilpai.
8 Uwa, mulapa Mayatjaku tjukurpa tjukaṟuru mulapa. Ka panya aṉangungku tjukurpa nyara palunya kuliṟa pukuḻaripai, panya palumpa tjukurpa wiṟu mulapa. Ka tjukurpa nyara paluṟu nganaṉala utilpai Godaku iwara tjukaṟurungku waṉantjaku.
9 Nyangatja wiṟu alatjiṯu ngaṟanyi nganaṉa Mayatja Godanya waḻkuntjaku. Kala rawangku palunya kutju waḻkunma, panya palumpa kulintja tjukaṟuru alatjiṯu tiṯutjara ngaṟanyi.
10 Puḻi gold wiṟunya mani puḻka mulapa, palu Godaku tjukurpa wiṟu mulapa goldpangka muṉkara alatjiṯu. Ka tjuratja panya mayu wiṟu, palu Godaku tjukurpa wiṟu mulapa wantinytjaku wiya tjuratjangka muṉkara mulapa.
11 Ngayulu Mayatjala wangaṉarangku kulilpai, kaṉi palumpa tjukurtu tjukaṟurungku palyantjaku nintilpai. Ka ngayulu palumpa tjukurpa kulinnyangka Godalu ngapartji ngayunya wiṟuṟa kanyini.
12 Nganaṉa uwankarangku walytjangku puṯu ngurkantananyi kura uwankara nganaṉa palyantjatjanungku. Ka Mayatja, ngayuku kalyparingama ngayulu watarkungku kura palyannyangka.
13 Munu ngayulu nintingku kura palyantjikitjangku kulinnyangkampa ngayunya markunma kura kutju tiṯutjarangku palyalkatinytjaku-tawara. Kaṉa palulanguṟu kuṉṯa wiya palya nyinama.
