1 Machi, melle an-igar-odurdaked be iego, be-gwage-ulubgi an-igar-maid be sedigu guo.
2 Ar deyob be imakele, we-napneggi suitii mai be guoed, weligwar-itodii be guoed.
3 Sabgued-igar melle be iego, napiragwad-igar melle be iebalo. Igi wingwa be-dukargi-naigu be gudidae, deyobi be imako, be-gwage-ulubgi sedigu be imako.
4 Deyob be imakele, Bab-Dummad nabir be-dakoed, dulemar nabir be-dakmogoed.
5 Melle be-ibmar-wisidba be nanadii guo. Bab-Jehováʼgi bela-belad-ulubgi-bensuli be nanadii imako.
6 Bela be ibmar-imakedgi Bab-Jehováʼse idakdii be imako. Deyob be imakele, Bab-Jehová bega igar nueganbi imakoed.
7 Mer be binsao, “An ibmar nue-wisye.” Bur be Bab-Jehová dobee nanae, bur be ibmar-isgana-imakedgi bangue.
8 Deyob be nanaele, we-igala, bela bega ina-nuedga guoed, bela bega be-abagan ogannogoed.
9 Be-ibmar-nikad-Bab-Jehováʼga-ukedgi Bab-Jehová-nug be odummoge. Gebe be-ibmar-sanmaked-Bab-Jehováʼga-ukedgi Bab-Jehová-nug be odummoge.
10 Deyob be imakele, be-ibmar-gwag-saboged-uu ena sii guoed, be-vino-binigan e-galugi ena sii guoed.
11 Machi, Bab-Jehová sabsur-be-odurdakalile, melle isdar be itogo, melle be urwebalo.
12 Igi baba na e-mimmi-sabedba sabsur-odurdakdae, deyobi, Bab-Jehová dulemar-sabedi sabsur-odurdakdamogad.
13 Dule binsaed-nikagued nikunonikile, we-dulegi nued binsalegoed. Dule ibmar-nue-wisi gunonikir, we-dulegi nued binsalegoed.
14 Binsaed-nikagued maniba bur bule ibnuedid, orba bur bule egi ibmar-nuegan amileged.
