11 Ar wemar Dule-E-Bendaked-Gandikid nikad. Dule-sergansated-bendakegala, be-abin gwisguoed.
12 Ibmar-durdaksadba be ibmar imake, binsaed-nued-uklegedi, be nue-itoge.
13 Melle be mimmigan-odurdaksuli gue, molidubgi-bibyolegedba burgosulid.
14 Ar bur be molidubgi-bibyogele, burgwed-igargi be ollor-imaknaid.
15 Machi, be dule-binsaed-ibedga gunonikile, gwagegi an weligwar itomogoed.
16 Be-sunmakedi, napiragwadba be sunmakele, ulubgi an yeer itononikoed.
17 Melle be dule-isganamargi nobgue, bur be bane-bane Bab-Dummad-nug odummodii imake.
18 Adi, yoedse bega ibmar nueganbi guoed, na be ibmar-edarbediid nikudapoed.
19 Machi, nue be itoge, binsaed-nikaa be dae, igar-innikigwadbarbi be nanadii sae.
20 Dule-gadi-mumgumaladba mer be akae. Dule-gadi-masgunmaladba mer be akadii gubali.
21 Ar dule-gadi-mumgumaladi, degi, gadi-mas-gunmaladi, dule-wilegedga gumaloed. Ar dule-gabedginbi-binsaedi, unnila mor-siir-siir-yoi gudiguoed.
22 Be-bab-we-napnegse-be-odenonikid be itoge, be-nan seredgusale, mer be isdar-dako.
23 Igar-napiragwad, nue-binsaed-nikagued, be amie. Ibmar-durdaked, nue-ibmar-wisigued, be amie. Wemala, mer be ibmar-baid-anar ogwao.
24 Dule-nued-e-baba na bela-bela yeer itoged. Dule na machi-binsaed-ibed-nikad, weligwar itoged.
25 Be-bab, degi, be-nan, werguega be imake. Be-sergan-we-napnegse-be-senonikid wergumalaga be imake.
26 Machi, an-bega-binsaed-dakdiidgi be binsae, an-nanadiid be dake.
27 Ar ome-gambanuchu-imakedi, yaa-dummad-matusursiidyob gued. Dule-baid-ome-galagwensur-nanaedi, dia-garagwad-matusursiidyob gued.
28 We-omedi, dule-atursaedyob matarmakdidaed. We-ome, machergan-bukidar-e-ome-dikarba-yolemalaga imaked.
