Proverbios 22:23-28

²³Paycunapa faburnin Tayta Diosmi canga. Paycunata suwapajtaga Tayta Diosmi ima-aycantapis guechonga.

²⁴Fiyu runacunawanga rabyaj runacunawanga ama goturanquichu; ni ama amïgupis canquichu.

²⁵Chayno runacunawan goturarga mala-mäña caytami yachacunquipaj. Chayno carga quiquillayquimi cuncayquiman wascata churacuycanqui maticunayquipaj.

²⁶Juc runa jaga-tucuptenga ama garantiyanquichu.

²⁷Päganayquipaj imayquipis mana captenga cämayquitapis guechushunquipämi.

²⁸Unay castayquicuna jawishan lindacunataga ama witichinquichu.