8 Ar rey igar-nabogega e-ologanagi sigisale, unnila e-atakedgi bela ibmar-isgana baramied.
9 Dule geg soged: “Andi gwage swilidik-nikaye, andi isgued sateye.”
10 Bab-Jehová ibmar-sogbogwad nabir daksulid: Nibir-noaled, wilubsaed-noaled.
11 Machigwa e-ibmar-imakedba magar dakleged, e-daed innikigwadid, degi, nuedbalid.
12 Bab-Jehová ibmar-sogbo yeerdakle obinnisad: Uaya, ibmar-itogegar. Ibya, ibmar-dakegar.
13 Mer be dule-wilegedga-guega, mer be gabedginbi binsae. Bur be arbaedginbi binsae, adi, mas obinebaka be nikuoed.
14 Dule-ibmar-bakedi, yamo sogdedaed: “¡Wedi nuedsuli! ¡Wedi ibmar-isgana!” Ar we-ibmar-baksad-sorbardi, weligwar itodaed.
15 We-napneggi, ormar-nika-inigwele, akwa-nuegan-nika-inigwele, dule-binsaed-ibed-e-sunmakeddi, we-ibmarmarba bur nuedid.
16 Dule-akudaked-anar dule-mani-bennukoye-sogsad-ibe, ibmar-nued be sue. Mani-bennukegala, dule-e-ibmar-nued be gae.
17 Dule, emar-yardakedgi masgunned-amiedi yeer-itoged, degi-inigwele, a-masgunnedi durgan-gunneyob gued.
18 Igarmar-nuegan-amilegedi, binsaed-nued-dakedba amileged. Bila-onolegegala, igar-nikaa imaklegergebed.
19 Dule-galagwensuli-sunmakedi, ibmar odukusulid. Degisoggu, dulemar-gadi-galagwensuli-sunmakmaladba mer be akae.
20 Dule e-bab-ukabsaele, e-nan-ukabsaele, nuchukwaa burgoed.
21 Gebegi ibmar-irgwensursunna-nikulegedgi, be yeer itogosulid.
22 Mer be sogo, an buged-mai imakoye. Mer be Bab-Jehováʼgi bensuli gue, ar e be-bendakoed.
23 Bab-Jehová nibirmar-noaled isdar-daked, ibmar-wilubdaked-noaled abesulid.
24 Bab-Jehová, dule-iduega gued. Degisoggu, dule na yoedse igi-guoed wissulid.
25 Nue-binsassuli Bab-Dummadga-ibmar-imakoye-soged bonidar-dummadid. Geb sogsad-sorba, binsadele, an ibiga deyob sogsadibeye. Deyob-binsaedi, bonidar-dummadid.
26 Rey-binsaed-ibedi, dule-isganamar-oaisakied. Ob-ubigwar-imaklegeyob ese ubigwar gumalad.
27 Dule-burba, Bab-Jehová-anmarga-uksadi, bela gwage-ulubse binsaed-baramied. Ar a-burba, gwallu-meegwadyob dulega uksad.
28 Wile-dule-daklegedi, degi, napiragwadgi-ibmar-soglegedi, rey-bendakega gued. Rey-e-negdakmaidi, wile-dule-daklegedgi gangumaid.
29 Sapingan-e-werguedi, e-garganguedgi siid. Sergan-e-werguedi, e-ibmar-wisidgi simogad.
