2 kagraka'a huvempama hu'nenana kemo kinama regatenigenka,
3 mofavre'nimoka amana huo, hago agri azampi mani'nananki kagra'a kavufa anteraminka ana nete vunka, kasunku naneke ome hugeno kina reogantena amne manigahane.
4 Kavu tokora osunka, kavura omasenenka, ame hunka vuo.
5 Kagra dia afumo'ene namamo enema zgagfama ahe vahe'mofo azampinti ame huno freankna hunka, kagra'a kavufga kaguvazio.
6 Eri'zama e'ori feru vahe'motma kipazuvemoza nehaza zante ome negeta, rempi huta nentahita, knare antahizana eriho.
7 Kipazuvemofona kva vahe'zmia omanigeno, zamazeri ante fatgohu kva vahe zamia omanigeno, kvama krizamante kva vahe zamia omani'neanagi,
8 ne'zamo'ma rama'ama fore hianknafina nezama omane knafima nesagura, nezana eri atru nehaze.
9 Eri'zama e'ori feru vahe'motma, nama'a zupa tamavura masegahaze? Nazupa masetamavuna segahaze?
10 Osiagna ko kavura masenka hinkrafora antegenko, osiagna ko mago'ane manifru nehunka, osiagna ko mago'ane kagemazampare kazana antenka manifru hananana,
11 mago zanka'a omanetfa hanigenka, kumazafa vahemo atireti kazerino fenozanka'a erivgareankna hugahane.
12 Mago zazmi omane kefozama nehaza vahe'mo'za akrehe krehe zmageru aruza vano nehaze.
13 Ana vahe'mo'za havigema nehanuza zamavu resukinegamiza, zmagiareti rekapasga nehu'za, zmazanteti ene erigu'a hu'za avame'namera hugahaze.
14 Havi avu'avazama erifore'ma hu'zamo zamagu'afina avitenege'za, kefo avu'avazana hakare zupa nehu'za, hazenkea eri hakare hu'za nevaze.
15 E'ina hu'negu e'inahu vahetera hantka huno havizamo'a agritera eno, ame huno azeri haviza hanigeno, anama azeri havizama hania knazama eritre kana omanetfa hugahie.
16 Sigisi'a zama Ra Anumzamo ago'matenentea zantami me'neanagi, seveni'a zamo'a Ra Anumzamofo avurera kasrino haviza me'ne.
17 Agra avufga erisga nehuno, ru vahe kefenkami atre'zane, havigema hu'zane, hazenke'a omane vahe'ma aheno korama'a eri fegi atre'zane,
18 havi antahintahizamo antahintahifima mevite'zane, havi zante'ma ame huno avreno neviazane ave'nosie.
19 Keagama refkohu trate osu'nea zanku tamage nehie huno havige hu vahe'ma, zamagipintima krunagema hu'zama atineramia zane, naga'afima hazenke zama eri hakare nehiazana Anumzamo'a agonete.
20 Mofavrenimoke, negfa'ma kasamisia kasegea otretfa nehunka, negrera'ma rempi hugamisia kea amge'anto.
21 Kagu'afi erintenka azeri antakro maka zupa nehunka, avaseseza hiankna hunka rugaginka knankempi anakio.
22 Kama vanoma hananana ana kemo kazeri fatgo nehuno, kavu'ma masesanana kegva huneganteno, masenesampintima oti'sanana nanekea kasamigahie.
23 Na'ankure ama ana kasegemo'a rampe tavikna higeno, amama rempima huneramia kemo'a msa megeno, kazeri fatgohu kavumroma antea kemo'a, manizamofo ka me'ne.
24 Savri a'nemo'za kazeri hava huzankura ana kemo kza nehina, neve'enema mni fatgo osu savari avu'avazante vanoma nehania a'mofo haganentake ageru'mo'a kazeri havizana osugahie.
25 Ana a'mofo agi agonagura kegasanea osuge, atregeno kavazu hunaku'ma avuretima revumima hugamisia zamo'a kavazua osino.
26 Na'ankure savri a'enema mase zamo'a kazeri kefo regahianagi, vereti a'mo'ma kavazu haniana kasimu ka'a erigahie.
27 Akru huno neresia tevema hankeri kasumpima antesanana kukenaka'a azerino ontegahifi?
28 Teve zugu'ma neresifima kaga vapama vananana, kagagusa teonkasagegosifi?
29 E'ina hukna hugahane, tava'onka'arema nemanisia ne'mofo a'enema masege, monkozama hananana hazenke erigahane.
