11 Na'ankure zamahoma ke'nia Nera hankave Ne' mani'neankino, tamagrira keaga Agra'a hurmantegahie.
12 Kagu'areti kavumro kea nentahinka, antahizama kami kere kagesa antenka antahio.
13 Mofavrema azeri fatgoma huzankura, korera osuo. Kagrama knoma amisanana ofrigahie.
14 Azeri fatgo hu knoma amizamo'a, fri vahe kumapima vuzankura agu amena agu'vazigahane.
15 Mofavre'nimoke, ama' antahizama erisiana, Nagri nagu'amo'a muse nehuno,
16 kagipinti'ma fatgo ke'ma antahi'sugeno'a, mika nagu'amo'a muse hugahie.
17 Kumi vahe'mokizmi zamavu'zmavakura kegasanea osuo. Hianagi Ra Anumzamofonku kore'ma hunteno agorga'ama manizanku maka kna, kagesa antahio.
18 Henkama fore hania zankuma tamage hunka kagesa nentahinka, amuhama nehana zamo'a amnezanknara osugahie.
19 Mofavre'nimoka, ke'ni'a antahinka knare antahi'zana erinka, fatgo kante kagu'a antenka vuo.
20 Rama'a aka'tima nene'za neginagi nehaza vahe'ene, rama'a zgagfamofo ame'are'ma nehaza vahe'enena, trago oteho.
21 Aka tinte vahe'ene ra'ma'a nezama ne' vahe'mo'za, zmunte omne vahe manigahaze. Hagi avu'ma mase vava vahe'mo'a, kukena zamimo'a tagato tagatu hugahie.
22 Kasema kante'nea negafa ke'a nentahinka, negrerama tvavaresigenka kefenkamia otro.
23 Tamage ke'ma mizase'nenunka zgorera otro, ama' antahizanki, huoguma rempima hugamisiazanki, antahi'ama huno refkoma hu'zana erio.
24 Fatgo avu'avama nehia mofavremofo nefa'a, tusi'a muse hugahie. Hagi ama' antahiza eri'nea mofavre'agura, nefa'a muse huntegahie.
25 E'inahu kavukva hunka negrera kfama azeri muse nehunka, ksegante'nea negrerana azeri muse huo.
26 Mofavre'nimoke, kagu'tumoka'a Nagri nenaminka, kvuma ke'sanana, Nagri navu'navate kento.
27 Monko avu'avama huno Savrima huno vanoma nehia a'mo'a, murigankna higeno, vema ante'nea a'mo'ma savrima huno vanoma nehia a'mo'a, osi tinkerigna huno urami'neankino, ana tinkerifima uramisaza vahe'mo'za haviza hugahaze.
28 Ana a'mo'a kumza vahe'kna huno kazeri savri hunaku kaveganteno mni'neankino, venenea azeri savri hanigeno, mani fatgo huno a'are'ma omani'zamo'a ra hugahie.
29 Iza hazenkefina mni'vava higeno, iza asu zampina nemanie? Iza ke hakarea nehigeno, iza hara azeri o'netie? Iza avufamo hazenkea erigeno namuna nere? Iza avumo korankera nehie?
30 E'i anazama fore'ma nehiana zazate'ma aka tima nenaza vahe'ene, hanave waini tima tagi havia hu'za ne'naza vahe'tmimofonte fore nehie.
31 Atregeno wainimo'ma korankrema nehuno, agrema'amo taferopinti krakra huno mrenerino, knankente'ma fruma huno urami'nia zamo'a, kazeri kasanea osino.
32 Hianagi henka'a hamu osifavemo kreankna nehuno, ha' osifavemo kamprino avuatgazama'a regatati huganteankna hugahie.
33 Kavumo'a ruzahu ruzahu'za negenkeno, antahintahi kamo'a savri nehina, kema hanana kemo'a savri hugahie.
