Pisalem 35:16-25

¹⁶Digaula e mmada haga gulugulua mai gi di au gadoo be tangada ma ga gadagada haganneennee tangada habehabe.

¹⁷Meenei Dimaadua, e waalooloo behee go do daumada hua au gei deai dau mee e hai mai gi di au ai? Haga dagaloaha ina au gi daha mo teebagi digaula. Haga dagaloaha ina au gi daha mo nia laion aanei!

¹⁸Gei au ga danggee adu gi di Goe i lodo au hagabuulinga daangada. Au ga hagaamu Goe i mua digaula huogodoo.

¹⁹Hudee heia ogu hagadaumee mo digau hai kai tilikai aalaa gii mmada tene gi dogu magedaa. Hudee heia digau hagadugina i di au dono hadinga ai la gi tenetene gadagada haganneennee gi dogu manawa gee.

²⁰Digaula hagalee leelee hagahumalia, gei digaula e dili nadau hagadilinga kai tilikai huogodoo i digau ala e noho hagahumalia.

²¹Digaula e wwolo gi nua e hagahuaidu au boloo, “Gimaadou guu mmada gi dau mee dela ne hai!”

²²Gei Goe, meenei Dimaadua, gu gidee Goe nia mee aanei. Malaa, gei Goe hudee noho deemuu, meenei Dimaadua. Goe hudee hagamogowaa ina Goe i di au!

²³Meenei Dimaadua, du gi nua, haga dagaloaha ina au. Meenei dogu God, du gi nua hagamaamaa ina au i lodo dogu gabunga.

²⁴Meenei Dimaadua, Kooe dela e donu, hagamodongoohia aga ina bolo au ogu huaidu ai. Hudee heia ogu hagadaumee gi tenetene gi dogu haingadaa.

²⁵Goe hudee heia digaula gi helekai boloo: “Mee gu doo gi daha. Deelaa tadau mee nogo hiihai ginai!”