Pidipos yacnocquidon Iste 3:5-18

⁵Isadaidbo nebi. Isadaidbon chidon tishacsho sietetedec ushun Moisesën chiampicpadomboen shui dëbid dëteshunenëdaidquio nebi. Con matses tsusedpa Benamin yampid icnuc Ebedeyombo nebi. Isadaidbo caimbidi Ebedeyo capec. Adquid yec aidën onqueten onquequid nebi. Moisesën chiampid namequidquio padiseyobo caid niondabi.

⁶Adquid icquin icsambo icquido danquin Esus tantiaquido cuesun secatiadquio iccondabi. Nuquin Papan chiacpadomboen natiadquio iquequi adondabi. Moisesën chiampiduidi nate bunquiondabi.

⁷Adquid icquin Esus tantiabi: —Ëmbimbo naic bëdamboshë iquebi —quequin icsamboen tantiapondambi. Adondaidi Esus tantiabenash: —Ëmbimbo naiquini icsambo iccoc.

⁸Nëbi con Icbombo Esuquidistu tantiec bëdambo iquebi —quequin tantiabenondambi. Aiduidtsëqui tantiatiadquio icquin icsa secacbimboen ëmbimbo naid ënondambi.

⁹Esus tantiate bunquiebi. Adquid yec: —Moisesën chiampicpadomboen ëmbimbo naiquini bëdambo iquec —quetiapimbo yanashic nadondabi. —Nuquin Papambien aton Mado Esuquidistu tantiasho bëdamboen isquin ëbi bëdamboen tabadmec —quequin tantiabenondambi.

¹⁰Aden tantiabenshun Esusuidtsëqui comapenen tantiatiadquio iquebi. —Comapenen tantiaquin Nuquin Papan uincuemiaid icquin Esusën bëdamboen tabadmetsiashi —quec Esus tantiate bunquiebi. —Nuquin Papan chiacpadomboenuidi nasho mëyanac Esus unësac caondash. Adembidi Nuquin Papan namiacpadomboen nasho mëyanac chieshtotiapimbo ictsiabi.

¹¹Unësambo icsho Esusën bëdamboen tabadmetsiashi. Unësacsho Nuquin Papan uincuemetsiashi —quec adec Esus tantiate bunquiebi.

¹²Tantia, con utsibo. Mibitedi chuinu. —Nuquin Papan chiaid niaquesambo nebi —¿quectabi ique? Padenquio. Adquio ictiadquidi adquio yenquieni icchitec. —Bëdamboshë icmenuen Esuquidistun yuapondashi —quequin tantiec bëdamboshë icte bunquiebi.

¹³Adec bëdambo yanabi yec: —Ëmbi naboed naic bëdamboshë iquebi —quenquio icquin Esusquio tantiaquin ambi chiacpadomboen natiadquio iquebi.

¹⁴—Bednu —quequin bedteuidtsëqui tantiec titinquiacbimboen Esusquio tantiaquiec ambi chiacpadquiec bëdambo ictiadquio iquebi. —Adec tabadec unësacsho Nuquin Papan abi yacno ëbi tabadmec —quec bëdambo icte bunquiebi.

¹⁵Nuquin Papan chiacpadomboen natiadquio icquin ëmbi chuibocpadomboen mimbi tantiatsiac. Utsien: —Padi. Pabadon chiaid abitedi nainquio icquin abentse-abentsen naindambi —quesho Nuquin Papan ambi tantiaid bëdamboen tantiametsiash.

¹⁶Nëbi nuqui icbocpadquiec tantiananquiec bëdamboec tabadnuna.

¹⁷Ëbi yacpadquiec bëdamboec tabadta. Ëmbi chiacpadomboen utsibon nasho isun adomboembidi bëdamboen nata.

¹⁸Ëmbi chuideniondacpadomboen mibi padpiden chiembi shubiquimbi. Mibi yacno utsi-utsiec icsamboec tabadpec. —Abided cuidadec cuesten dectamëdaid Esus tantiaquid nebi —quetsëcboedi icsamboec tabadec. Adquido Esus tantiaquidpenquio nec.