7 Apômtau oc êŋgôŋ nê lêpôŋ endeŋ tôŋgeŋ. Eŋ ketoc lêpôŋ kêkô gebe êmêtôc biŋ.
8 Ŋac tageŋ tonaŋ tec kêmêtôc lau nomŋa nêŋ biŋ jagêdêŋ ma kêkêŋ ŋagêjô gêdêŋ tenteŋlatu gêjô gêŋ, taŋ sêgôm naŋ.
9 Apômtau kêtu lau, taŋ sêôc gêŋwapac naŋ, nêŋ tuŋtêna. Eŋ kêtu tuŋtêna gebe êsêac sêŋgôŋ ŋalêlôm êndêŋ taŋ gêŋwapac êŋgôm êsêac naŋ.
10 Amboac tonaŋ êsêac, taŋ sêjala aômnêm ŋaê naŋ, sêkêŋ mateŋ aôm. Aôm Apômtau tec gôwi êsêac, taŋ sesom aôm naŋ, siŋ atom.
11 Awem êôc Apômtau, taŋ gêŋgôŋ nê lêpôŋ gêŋgôŋ Sion naŋ, asôm ênê gêŋsêga lasê êndêŋ tenteŋlatu sêŋô,
12 gebe eŋ taê gêjam gebe êkac êsêacnêŋ kamocgôc. Eŋ kêliŋ môêc, taŋ lau ŋasec sêmôêc gêdêŋ eŋ naŋ, siŋ atom.
13 O Apômtau, taŋ kôkô aê auc gêdêŋ jamac êndu ŋasacgêdô naŋ, taêm labu aê. Ôlic aêmamaŋ gebe ŋoc ŋacjo sêgôm aê kwalecgoc.
14 Aê gabe jasôm aômnêm gêŋ towae lasê samob. Jakô Sion latuo nê sacgêdô ma aoc êôc aôm toôndu, gebe gôjam aê sa.
15 Lau samuc nêŋ sê, taŋ sêkwê kêtu aêŋa naŋ, êsêac tauŋ sêu tauŋ sêsêp. Tauŋ eŋkaiŋ gêwê uc, taŋ sêkic kelecgeŋ naŋ.
16 Apômtau kêmêtôc biŋ gêwa tau sagac. Ŋac alôb-alôb gêwê tau lêma ŋalakô.
17 Lau alôb-alôbwaga sêsêp lamboam sêja, ma lau samuc samob, taŋ sêliŋ Anôtô siŋ naŋ, amboac tonaŋgeŋ.
18 Anôtô oc êliŋ lau ŋalêlôm sawa siŋ ŋapaŋ atomanô, ma lau ŋasec sênsaê gêŋ, taŋ sêkêŋ mateŋ naŋ, elêmê atomanô.
