21 gebe lemoc êpuc eŋ tôŋ endeŋ tôŋgeŋ ma lemoc êkêŋ ŋaclai êndêŋ eŋ.
22 Nê ŋacjo ênsau êôc eŋ êtôm atom ma secwaga teŋ êku eŋ tulu atom.
23 Aê gabe janseŋ ênê ŋacjo popoc sênêc eŋ laŋônêmŋa ma janac êsêac, taŋ sêkêŋ kisa eŋ naŋ êndu.
24 Aêŋoc biŋ ŋaŋêŋ to têtac gêwiŋ teŋgeŋŋa êpuc eŋ tôŋ. Aêŋoc ŋaê oc êsuŋ ênê wae sa.
25 Aê jakêŋ ênê gôliŋ ŋamadiŋ aŋga gwêc ŋaluŋ e êndêŋ bu kapôêŋ Euprat.
26 Eŋ oc awa ênac aê gebe ‘Aêŋoc tamoc aôm, aôm kôtu ŋoc Anôtô to ŋoc moasiŋ ŋamôkê.’
27 Aê gabe jakêŋ eŋ êtu latuc ŋamêc. Eŋ kêtu kiŋ nomŋa nêŋ ŋatau.
28 Aê oc jamoasiŋ eŋ endeŋ tôŋgeŋ ma matoc êsap ŋoc poac tôŋ ŋajaŋa êtu eŋŋa.
29 Aê gabe jawaka ênê gôlôac nêŋ teŋ sa endeŋ tôŋgeŋ gebe êtu kiŋ ma ênê lêpôŋ êkô ŋapaŋ êtôm undambê.
30 “Ênê latui embe sêwi ŋoc biŋ siŋ ma nêŋ lêŋ eso aêŋoc biŋ, taŋ kajatu naŋ,
31 ma embe sêŋgôm aêŋoc biŋ êtu meloc ma sêkêŋ taŋeŋ ŋoc biŋsu atom,
32 oc jai êsêac ŋa palip êtu sêkac tauŋ suŋa ma oc janac êsêac êtu nêŋ kwalecŋa.
33 Mago gabe jaŋgamiŋ ŋoc moasiŋ êndêŋ Dawid atom ma jansa ŋoc biŋ ŋaŋêŋ auc êndêŋ eŋ atomanô.
34 Aê gabe jaŋgôm ŋoc poac êtu biŋ lêlêŋa atom ma janam biŋ, taŋ aocsuŋ kasôm lasê naŋ, ôkwi atom.
35 “Aê ŋac dabuŋ, tec katôc lemoc sa kêpi tauc katu dim tageŋ gebe jansau Dawid teŋ atomanô.
36 Ênê gôlôac oc sêmoa endeŋ tôŋgeŋ. Ênê lêpôŋ êtôm oc, taŋ kêkô aê laŋôcnêm naŋ.
37 Eŋ oc êmoa endeŋ tôŋgeŋ êtôm ajôŋ, taŋ kêtôm gêwa-biŋ-tau-sawaga ŋaŋêŋ aŋga tao lôlôcŋa naŋ.”
38 Mago galoc aôm kôtiŋ to kômasuc ma têmtac ŋandaŋ gêdêŋ nêm ŋac, taŋ goeŋ oso eŋ naŋ.
39 Aôm kôsap poac, taŋ kômoatiŋ gêdêŋ nêm sakiŋwaga naŋ tulu ma gôgôm ênê sunsuŋ kêtu meloc ma kôpalip kêsêp lêsap gêja.
40 Aôm goseŋ ênê tuŋbôm samob êliŋ-êliŋ ma kôsiŋ baliŋ ênê malac totuŋbôm e popoc jamuŋ-jamuŋgeŋ.
