3 Lôc sênam ŋanô moasiŋ êmoasiŋ lauŋa ma gamêŋ ŋabau sênam ŋanô biŋgêdêŋ.
4 Kiŋ êmêtôc lau ŋalêlôm sawa nêŋ biŋ naêndêŋgeŋ, eŋ ênam lau sêpô lênaŋa sa ma êka êsêacnêŋ lêsutêna popoc.
5 Gôlôac to gôlôac têtêc aôm êtôm têm, taŋ oc ajôŋ êpô gamêŋ naŋ.
6 Kiŋ êtôm kom, taŋ gêjac kêsêp kôm ma eŋ oc êtôm kom, taŋ kêmalôm nom naŋ.
7 Êtôm kiŋ tau nê têm biŋgêdêŋ ênac tau lêtêŋ amboac ŋaola ŋajam ma wama ênam gamêŋ auc kêtôm ajuŋ ŋawê kêpô gamêŋ gêôc aucgeŋ.
8 Ênê gamêŋ gôliŋŋa ênêc gwêc ŋamadiŋ teŋ e naêndêŋ ŋamadiŋ teŋ ma aŋga bu Euprat e naêndêŋ nom ŋamadiŋ.
9 lau gamêŋ sawaŋa sêpôŋ aeŋduc êndêŋ eŋ ma nê ŋacjo sêu tauŋ sênêc nom.
10 Kiŋ Tarsis to lau, taŋ sêŋgôŋ nuc naŋ, oc sejoŋ nêŋ awa nasênsuŋ êndêŋ eŋ. Lau Arabia to Aitiopia ŋataui oc sêkêŋ nêŋ awamata êndêŋ eŋ.
11 Biŋŋanô, kiŋ samob oc tetoc eŋ sa. Lau samuc samob oc sênam sakiŋ êndêŋ eŋ.
12 Gebe eŋ oc ênam ŋac ŋalêlôm sawa, taŋ awa gêjac eŋ naŋ sa ma ŋac ŋasec, taŋ gêjam-sawaga gêmoa atom naŋ, amboac tonaŋgeŋ.
13 Eŋ oc taê labu ŋac ŋaôma to ŋalêlôm sawa ma ejop lau sawa nêŋ katuŋ.
14 Eŋ oc ênam êsêacnêŋ katuŋ kêsi aŋga lêsutêna to ŋaclai-secwaga lemeŋ. Eŋ oc êlic lau tonaŋ ŋai nêŋ dec amboac gêŋ ŋanô.
15 Kiŋ oc êŋgôŋ ŋêŋgeŋ ma sêkêŋ gold Arabiaŋa êndêŋ eŋ. Êsêac teteŋ mec êtu eŋŋa endeŋ tôŋgeŋ ma Anôtônê mec êpi eŋ ŋapaŋ.
16 Mo êmôp lasê ênêc ênê gaboaŋ ma êtu secŋa ênêc lôctêpôê. Mu êôc ênê gêŋkaiŋ ŋatêpôê naêsêp-naêsêp amboac aŋga Lebanon ma ŋamalac êlêc aŋga malac êtôm gêgwaŋ gêlêc aŋga nom.
17 Ênê ŋaê oc ênêc endeŋ tôŋgeŋ. Ênê wae ênêc êtôm oc êpô gamêŋ. Lau nomŋa samob aweŋ êôc eŋ ma teteŋ Anôtô gebe ênam mec eŋ to êkêŋ eŋ êmoa totêtac ŋajamgeŋ.
18 Lambiŋ êndêŋ Apômtau, lau Israelnêŋ Anôtô. Eŋ taugeŋ tec gêgôm gêŋsêga gêmoa.
19 Lambiŋ êndêŋ ênê ŋaê towae endeŋ tôŋgeŋ. Ênê ŋawasi ênam nom auc samucgeŋ. Biŋŋanô, biŋŋanôgoc.
20 Isai latu Dawid nê mec gêbacnê gêdêŋ tonec.
