4 Lau gamêŋ samobŋa sewec êndêŋ aôm ma aweŋ êôc aôm. Samob tetoc nêm ŋaê sa.”
5 Amêŋ ma alic gêŋ, taŋ Apômtau gêgôm naŋ. Eŋ gêjam gôliŋ ŋamalacnêŋ latuŋi e têtac kêsa laŋgwageŋ.
6 Eŋ gêjam gwêc ôkwi kêtu gamêŋ ŋakeleŋ, tec eŋkaiŋ sêsa ŋasamac ŋamala sêja. Ma aêac têntac ŋajam kêtu eŋŋa.
7 Eŋ ŋagôliŋ, nê gôliŋ oc ênêc teŋgeŋ. Mata kêsap tenteŋlatugeŋ, tec gêmoa. Lau-sêli-tauŋ-sawaga oc tetoc tauŋ sa êndêŋ eŋ atom.
8 O tenteŋlatuac, alanem aêacma Anôtô. Aŋgôm ênê wae êtu tapa ŋanô.
9 Eŋ gêjam aêac katuŋ sa, tec tamoa mateŋ jali ma kêpuc eŋkaiŋ tôŋ, tec taku atom.
10 O Anôtô, aôm kôsaê aêacgac. Aôm kôpac aêac e awê kêtom sêpac silber gêwê.
11 Aôm kôkêŋ aêac awê uc. Aôm kôkêŋ gêŋwapac gêsac aêac dêmôêŋtêkwa tôŋ.
12 Aôm kôkêŋ ma ŋacjo sêka aêac lênsôŋ. Aôm kôkêŋ aêac asa ja to bu ŋasamac ŋalêlôm aja, mago galoc gôwê aêac sa jaakô gamêŋ ŋajam.
13 Aê todajageŋ jasô nêm andu ma jaŋgôm biŋ, taŋ gajac mata su naŋ, ŋanô êsa.
14 Gêdêŋ taŋ kapô lêna naŋ, kasôm lasê ma aocsuŋ kasôm kêtu tôŋ gebe jaŋgôm gêŋ tau tonaŋ.
15 Aê gabe jansuŋ domba ŋalêsi êtu daja to domba kapoac ŋada ŋamalu êsa êndêŋ aôm. Aê gabe jamansaŋ bulimakao to noniŋ kapoac atu da êndêŋ aôm.
16 Amac lau, taŋ atêc Anôtô naŋ, samob amêŋ aŋô. Aê gabe janac miŋ biŋ, taŋ eŋ kêmoasiŋ ŋoc katuc naŋ.
17 Aê aocsuŋ gamôêc kapôêŋ gêdêŋ eŋ ma wê lambiŋŋa gêc imbeloc ŋatêpôê.
