7 Lau samob, taŋ sêlic aê naŋ, têtaŋ pêlê aê. Sêŋala to têdaiŋ gêsuŋ aê gebe
8 “Ŋac tau tonaŋ gêsuŋ tau gêdêŋ Apômtau, tec Apômtau akôc eŋ samaŋ. Apômtau têtac gêwiŋ eŋ, tec ênam eŋ kêsimaŋ.”
9 Aôm tonaŋ tec kôkôc aê aŋga tinoc têtaclêlôm, gojob aê ŋapep ma gaiŋ tinocnê su tôŋ.
10 Tinoc kêkôc aê su ma aôm gôjam jaom aê ŋapaŋ. Gêdêŋ aê katu awê naŋ, aôm kôtu aêŋoc Anôtô.
11 Ômoa jaêc aêma atom gebe gêŋwapac mêŋkêdabiŋ ma gêjam-sawaga teŋ gêmoa atom.
12 Bulimakao kapoac taêsam sêkôm aê auc. Bulimakao kapoac Basanŋa toŋaclai sêgi aê auc.
13 Gêŋ tau sêŋa aweŋ gêdêŋ aê kêtôm lewe kêtaŋ gebe êkaku gêŋ popoc.
14 Aê gawê amboac labi. Aêŋoc ŋatêkwa samob kêsu. Aêŋoc ŋalêlôm kêtôm lêp ma gêwê gêc ŋoc waŋlêlôm.
15 Aêŋoc koclabeŋ ŋakeleŋ kêsa amboac ku ŋasaboac ma imbeloc kêsap lôcboam tôŋ. Ma kôkôniŋ aê tôŋ gaêc gêmacanô ŋakekop ŋalêlôm.
16 Ojae, kêam sêgi aê aucgoc. Secwaga toŋ teŋ sêwa aê auc ma sêkim lemoc to octapa lasê.
17 Ŋoc ŋatêkwa samob gêc awêgeŋ. Êsêac mateŋ gê aê e gêjac mateŋanô ŋajam.
18 Êsêac sêjac sam ŋoc ŋakwê gêdêŋ tauŋ. Ma sêpuc kapoac kêtu ŋoc ŋakwê baliŋŋa.
19 O Apômtau, ômoa jaêc aêma atom. O ŋoc ŋaclai, mêŋônam aê sa sebeŋ.
20 Ônam aê kêsi aŋga siŋ ma ônam aê sa aŋga kêamnêŋ gebe jamoa matoc jali.
21 Ônam aê sa aŋga lewe awasuŋ ma ojop aê êndêŋ bôcgabuŋ ŋajabo.
22 Aê jasôm nêm ŋaê lasê êndêŋ ŋoc lasitêwai ma jalanem aôm jakô gôlôac ŋalêlôm.
