2 Aê gabe jalanem aôm êtôm bêcgeŋ ma aoc êôc nêm ŋaê endeŋ tôŋgeŋ.
3 Apômtau eŋ ŋac kapôêŋ, tec talanem eŋ ŋanômaŋ. Aêac ŋamalac oc tapuc ênê ŋam natatôm atom.
4 Gôlôac teŋ sêlanem aômnêm koleŋ êndêŋ gôlôac teŋ sêŋô ma sêsôm aômnêm ŋaclai ŋagêŋsêga lasê.
5 Êsêac oc sêsôm aômnêm ŋawasi to waem kiŋŋa lasê, ma aê gabe jaŋga wê êpi nêm gêŋsêga.
6 Lau oc sêsôm aômnêm gêŋsêga ŋaŋaclai lasê ma aê gabe jawa aômnêm waem kapôêŋ sa.
7 Lau oc sênac aômnêm moasiŋ teŋgeŋŋa ŋamiŋ to têtu samuc aômnêm biŋgêdêŋ toôndugeŋ.
8 Apômtau eŋ ŋac moasiŋ to taê walô ŋam. Eŋ gêbiŋ tôŋ ma têtac gêwiŋ teŋgeŋŋa gêjam eŋ auc.
9 Apômtau eŋ ŋajam gêdêŋ ŋamalac samob ma eŋ taê labu gêŋ samob, taŋ kêkêŋ naŋ.
10 O Apômtau, gêŋ samob, taŋ kôkêŋ naŋ, sênam daŋge aôm. Ma nêm lau mansaŋ sêlanem aôm.
11 Êsêac oc sêsôm aômnêm gamêŋ kiŋŋa ŋawae lasê ma sênac aômnêm ŋaclai ŋamiŋ
12 gebe ŋamalacnêŋ latuŋi sêŋô aômnêm gêŋsêga to aômnêm gamêŋ kiŋŋa ŋawasi ŋanô ŋawae.
13 Aômnêm gamêŋ kiŋŋa ênêc teŋgeŋ ma ônam gôliŋ gôlôac to gôlôac ŋêŋgen êna. Apômtau gêgôm nê biŋ samob ŋanô kêsa ma nê koleŋ samob gêwa ênê têtac gêwiŋ sa.
14 Apômtau kêpuc lau samob, taŋ sebeŋ naŋ tôŋ ma gêjac êsêac samob, taŋ sêŋgôŋ sêpô dêducgeŋ naŋ sa.
15 Lau samob mateŋ gêdiŋ aôm ma aôm kôkêŋ êsêacnêŋ mo gêdêŋ ŋanoc.
16 Aôm kôlaiŋ lêmamtapa ma gôlôm gêŋ mateŋ jali samob e gêôc êsêac tôŋ.
17 Apômtau gêgôm nê gêŋ samob gêdêŋgeŋ ma gêgôm nê gêŋ samob tomoasiŋgeŋ.
18 Apômtau gêmoa êsêac, taŋ aweŋ gêjac eŋ naŋ ŋagala ma gêwiŋ êsêac samob, taŋ aweŋ gêjac eŋ toŋanôgeŋ naŋ.
19 Eŋ gêjam êsêac, taŋ têtêc eŋ naŋ, nêŋ sêpô lêna sa to gêŋô êsêacnêŋ taŋiboa ma kêpuc êsêac tôŋ.
20 Apômtau gejob êsêac samob, taŋ têntac gêwiŋ eŋ naŋ, ma oc enseŋ lau alôb-alôb samob su.
21 Aoc êôc Apômtaunê wae ma lau nomŋa samob sêlanem ênê ŋaê dabuŋ teŋgeŋ ma teŋgeŋ.
