2 Ta ibeta gid, “Ngan ado toaiua lolomi matua ngan Iesus, gimi abada Itautau Tutui na?” Be tikeo, “Oo. Gai alongo ngan Itautau Tutui eta imamado mao.”
3 Ta ibeta gid, “Be abada paliliunga isaoa?” Ta tikeo, “Gai abada Ioanes ele paliliunga.”
4 Ta Paulus ikeo, “Mugaeai Ioanes ipaliliu gid panua ta ikeo ga gid manta tipul lolod ta tibada paliliunga. Be ikeo pagid bedane, ‘Eaba ede ga inam muriai ngan gau, gimi manta lolomi matua ngan ei.’ Be eaba toa Ioanes iposaposa ngan eine Iesus.”
5 Io, tilongo bedaoa ga kus ta tibada paliliunga ngan Maron Iesus ieda.
6 Be Paulus idol ibage ga idae ngan gid ga kus ta Itautau Tutui isulug ga inam pagid, ta maed ikakado posanga imata ede ga ede ga tibabada Deo iaoa.
