12 Sa noꞌo yo sa nuwa ponopono be sa fafatiꞌo fuyoꞌidi tiyen, Ite aniyona somo?
13 Na hahaisa sa lau faliuhwaꞌedi tiyen, Sa nom yauyaule?
14 Habahim Pita yo tau faꞌona wasawasa safuhudohudoꞌi esega sa obiyo fahi na ya liba laꞌilaꞌi baiwa lisidi iyen, Falegu Diusi yo salumadi mahudoꞌimiu Yelusalem yai ami miyamiya, au ataꞌatahi laoma lisigu na aniyona somo haba emi E liba.
15 Emi nuwatuhu bena tatau te sa nom yauyaule. Higeꞌe! Itete hola 9 koloki ma hwalahwalalana.
16 Itete fuya bwaꞌibwaꞌina yai Peloweta Diyoweli haꞌa ya libaen:
17 “Yaubada iyen, “‘Fuya ofiꞌofidi yai haba Yaluwagu E fagoi dodoga mahudoꞌidi ai lebedi. Yo nanatumiu wawahin yo tatau haba sa liba peloweta. Ami hewahewali haba tautau sa itadi, yo emi tautaulaꞌi haba sa eno suwai.
18 Yo egu tau paisowa tatau yo wawahin lahaidi yai ni haba Yaluwagu E fagoi ai lebedi, be haba wasa loholohona sa lauguguyaꞌen.
19 Noꞌo abiꞌabidi haba E ginaulidi ai galewa, yo ai tanoꞌubu. Haba fafaꞌilala, ꞌwasina yo oyagi balebalelemdi yo madagafu E fataumahatadi.
20 Maihala haba ya kamukamumu, na Guyau ena fuyoma lahaina haꞌa ya sigisigima.
21 Yena sai Guyau hesana ya ataꞌatahi haba ya mwahuli.”
22 Pita iyen, Isalaela dodogadi, au ataꞌatahi! Ganahewamiu yai Yesu Nasaleta ena dudulai Yaubada ya fawananaha, logena lisina yai noꞌo yo fafaꞌilala ya ginaulidi mate umi ami sibaidi.
23 Yaubada ena nuwatuhu yai Yesu ya fasinabo nonohai be sa tole afulen nimamiu yai, na dodoga heyaheyayadi sa saguhimiu be ami tutu fapatu kolosi yai.
24 In moho Yaubada ya famwahuli fuyoi peꞌi kamkamnana yai paꞌana peꞌi hige gonowana i abi didini.
25 Kin Deiwidi haꞌa ya libaen iyen, “Fuya ouꞌouli Yaubada sadaigu yai E itaꞌitai. Paꞌana In maꞌegu, be ibege agu waiyunu ya ꞌwasabuwedi.”
26 Lisina yai nuwagu ya amna be E kwade yo E fadebasae. Yo E gogo susunuma mate taugu haba ya anyawasi,
27 paꞌana ibege tau peꞌipeꞌi edi nuꞌu yai u lau afulegu, yo ibege em Fatabu Dogana u ita afulen, be tauna i molu ai boꞌusa.
28 Mwahuli edaꞌedana haꞌa wa faꞌitagu; Yo Um ai matam haba E kwade wananaha.
29 Afa haidagu, E faliba komakomaꞌinimiu mate ada ulu tubu Deiwidi haꞌa ya peꞌi be sa boꞌusai na boꞌusana mate hola otana amaiteꞌi.
30 In mate peloweta na ya sibai mate Yaubada haꞌa ya angwala lisina yai haba Deiwidi laulauwewena hesa ya famala Baꞌisa gonogonowana doha in Deiwidi.
31 Fuya matada yai somo haba ya tubu, mate Deiwidi haꞌa ya sibai, be ya liba iyen, “Keliso haba ya mwahuli fuyo, yo ibege ai boꞌusa i ita afulen be silanna i molu.”
32 Boꞌusa yai Yaubada, Yesu te ya famwahuli fuyoi, be matamai yai haꞌa ꞌe ita.
33 Tamana Yaubada ya tole hitiꞌi be sibana yai aba fafaꞌatiti yai ya taꞌai. Ena liba fasunuma mate Yaluwa Tabuna ya felen, Yesu. Logena ya fagoi lidiyen hewada yai mate, haꞌa ami ita yo ami atahiyen.
34 Deiwidi hige i hasai galewa. In moho ya liba iyen, “Guyau Yaubada ya libalau egu Guyau lisina iyen, ‘Ai sibagu u taꞌai,
35 ya lau ee–, am waiyunu E toledi ai ahem ubudi doha ahem aba tolena.”
36 Lisina yai Isalaela mahudoꞌidi bena sa siba komakomaꞌi mate Yesu te, In ami tutu fapatu, logena Yaubada ya tole Guyau yo Keliso.
37 Dodoga liba te sa atahiyen. Yo fede aluwadi sa potifahi be Pita yo tau faꞌona wasawasa hahaisa sa falibadi tiyen, Afa haidamai somo haba te ginauli?
38 Pita alinadi ya bui iyen, Esega - esega u nuwabui be u babasito Yesu Keliso hesana yai haba em heyaheyaya ya nuwa afulen na Yaubada ena ainauya, Yaluwa Tabuna wa abi.
