ኦሮሜ 3:4-25 in Gamo

⁴ ሙሌካ ዲጌና! ኣሲ ዉሪካ ዎርዳንቻ ቅ1 “ኔኒ ኔ ቃላፔ ዴንዲዳይሳን ቱማንቻ፤ ቅ2 ፒርዳንካ ፆኒዛዴ ጊዳሳ” ሄሳꬆ ጌቴቲ ፃፌቲዳ ማላ ፆሲ ቃሴ ቱማንቻ።

⁵ ኑ ማካላ ኦሶይ ፆሳ ፂሎቴꬅ ቆንጬን ቤሲዛይሳ ጊዲኮ ሂስቲን ኑ ኣይ ጋኔ? ጮ ኣሳ ዎጋ ማላ ፓላሜታናስ ፆሲ ባ ሃንቆ ኑ ቦላ ኤሂዛይሲ ኑስ ቤሴና ጋኔዬ? ሄሳካ ታ ጊዛይ ኣሳꬆ ቆፋና።

⁶ ቱማፔ ሄሳꬆ ሃኔና። ሄሳꬆ ሃኒዛ ጊዲኮ ፆሲ ኣላሜ ቦላ ዎስቲ ፒርዳንዴ?

⁷ ታ ዎርዶቴꬅ ፆሳ ቱማቴꬅ ቆንጪሲዛይሳን ኢዛ ቦንቾ ጌዴ ጉጂዛይሳ ጊዲኮ ሂስቲን ሃዒ ጋካናስ ዎስቲ ታ ቦላ ናጋራንቻ ማላ ፒርዴቲዜ? ጊዲ ፓላሜታና ኣሲ ዳና ዳንዳዬስ።

⁸ ሄሳ ጉሲ “ሎዖይ ያና ማላ ኣኔ ኢታ ኦꬆስ” ጌቴስ ጊዲ ኢሲ ኢሲ ኣሳቲ ኑ ቦላ ዎሬሲዛይሳ ማላ። ሃይታ ኣሳታ ቦላ ጋኪዛ ፒርዳይ ቱሙ ፒርዳ።

⁹ ሂስቲን ኑ ኣይ ጊኖ? ኑኒ ኢስታፌ ኣꬊዞኒ? ሙሌካ ኣꬎኮ። ኣይሁዳታ ጊዲኮካ ኣይዛቤታ ጊዲኮካ ዉሪካ ናጋራፔ ጋርሳ ባጋራ ዲዛ ጊሽ ታ ዉርሳካ ካሴታዳ ኢስታስ ዮታዲስ።

¹⁰ “ፂሎይ ኦኒካ ዴና፤ ኢሳዴይካ ዴና።

¹¹ ዩሺ ቆፒዛዴይ ባዋ፤ ፆሴ ኮዪዛይ ኢሳዴይካ ባዋ።

¹² ዉሪካ ባሌቲዳኔ ኢሲ ቦላ ጎዖንታይታ ጊዲዳ። ሎዖ ኦꬂዛይ ኦኒካ ባዋ፤ ኢሳዴይካ ዴና።

¹³ ኢስታ ዱናይ ዶያ ዲዛ ዱፎ ማላ፤ ኢስታ ዱናይ ኡባ ዎዴ ባሌꬆ ሃሳዬስ፤ ኢስታ ሜቴርሻይ ሾሻ ማርዜራ ዴስ።

¹⁴ ኢስታ ዱናን ቃንጌꬂኔ ጫሞ ሚሽ ኩሚዴስ።

¹⁵ ኢስታ ቶሆይ ሱꬅ ጉሳናስ ኤሶቴስ።

¹⁶ ኢስታ ኦጌን ꬋዮይኔ ላፋቴꬅ ዴስ።

¹⁷ ኢስቲ ሳሮቴꬃ ኦጌ ኤሬቴና።

¹⁸ ኢስታ ኣይፌሶን ፆሳስ ባቦይ ባዋ” ጌቴቲ ፃፌቲዳ ማላ።

¹⁹ ሄሳ ጊሽ ዱናይ ዉሪካ ጎርዴታና ማላ ዴሬይ ኩሜꬅ ፆሳስ ዛሮ ኢማና ማላ ዎጋይ ጊዛይ ዉሪካ ዎጋፔ ጊዶራ ዲዛይታስ ጊዲዳይሳ ኑ ኤሮስ።

²⁰ ሄሳ ጊሽ ዎጋይ ናጋራይ ኣዛኮኔ ኤሪሴስ ኣቲን ዎጋ ናጎን ኦኒካ ኢዛ ኣቻን ፂሎ ጌቴታናስ ዳንዳዬና።

²¹ ሃዒ ቃሴ ዎጋ ካሴ ናቤቲ ኢዛስ ማርካቲዳይስ ዎጋፔ ካሬራ ጊዲዳ ፆሳ ፂሎቴꬂ ቆንጪዴስ።

²² ሄሲ ፆሳ ፂሎቴꬂ ዬሱስ ኪርስቶሳ ኣማኖን ዱማቴꬂ ባይንዳ ቤቲዛ ፂሎቴꬃ።

²³ ጋሶይካ ኣሲ ዉሪካ ናጋራ ኦꬂዴስ። ፆሳ ቦንቾይካ ኣሳ ናስ ፓጪዴስ።

²⁴ ኣሳይ ዬሱስ ኪርስቶሲ ኣሳ ና ጊሽ ኦꬂዳ ኪያቴꬃፌ ዴንዲዳይሳን ጮ ሜላ ፂሊዴስ።

²⁵ ኢዛ ሱꬃን ጊዲዳ ኣማኖን ናጋራፔ ማሬታና ያርሾ ሂስቲዲ ፆሲ ዬሱሳ ሺሺዴስ። ኢዚ ሄሳ ኦꬂዳይ ካሴቲዲ ፖሌቲዳ ናጋራ ቃፃዮንታ ዳንዳያን ኣꬊዳ ባ ፂሎቴꬅ ቤሳናሳ።

⁴ Mulekka diggenna! Asi wurikka wordancha “Neni ne qaalappe dendidayssan tumancha; pirdanka xoonizade gidaasa” hessatho geetetti xaafettida mala Xoossi qasse tumancha.

⁵ Nu makala oosoy Xoossa xilloteth qoncen bessizayssa gidikko histin nu ay ganee? Coo asa woga mala palametanas Xoossi ba hanqo nu bolla ehizaysi nuus bessenna ganeyee? Hessaka ta gizay asatho qofanna.

⁶ Tumappe hessatho hanenna. Hessatho haniza gidikko Xoossi alame bolla wosti pirdandee?

⁷ Ta wordoteth Xoossa tumateth qoncisizayssan iza boncho gede gujizayssa gidikko histin ha7i gakkanaas wosti ta bolla nagarancha mala pirdetizee? giidi palamettana asi daana dandayees.

⁸ Hessa guussi “Lo7oy yaana mala ane iita ooththoos” geettes giidi issi issi asati nu bolla woresizayssa mala. Hayta asata bolla gakkiza pirday tumu pirda.

⁹ Histin nu ay giinoo? Nuni istafe aadhdhizonii? Mulekka aadhdhokko. Ayhudata gidikkoka Ayzaabeta gidikkoka wurikka nagarappe garsa baggara diza gish ta wursaka kasetada istas yootadis.

¹⁰ “Xilloy oonikka deenna; issadeykka deenna.

¹¹ Yuushi qoppizadey baawa; Xoosse koyizay issadeyka baawa.

¹² Wurikka balettidanne issi bolla go7ontayta gidida. Lo7o ooththizay oonikka baawa; issadeykka deenna.

¹³ Ista duunay doya diza duufo mala; ista duunay ubba wode baleththo haasayees; ista metershay shoosha marzera dees.

¹⁴ Ista duunan qangethinne camo miish kumides.

¹⁵ Ista tohoy suuth gussanas eesotes.

¹⁶ Ista ogen dhayoynne laafateth dees.

¹⁷ Isti sarotetha oge erettenna.

¹⁸ Ista ayfeson Xoossas baboy baawa” geetetti xaafettida mala.

¹⁹ Hessa gish duunay wurikka gordettana mala derey kumeth Xoossas zaaro immana mala wogay gizay wurikka wogappe giddora dizaytas gididayssa nu eroos.

²⁰ Hessa gish wogay nagaray aazakkone erisees attin woga naagon oonikka iza achchan xillo geetettanas dandayenna.

²¹ Ha7i qasse woga kase nabeti izas markattidays wogappe karera gidida Xoossa xillotethi qoncides.

²² Hessi Xoossa xillotethi Yesus Kirstoosa ammanon dummatethi baynda beettiza xillotetha.

²³ Gaasoyka asi wurikka nagara ooththides. Xoossa bonchoyka asa naas paccides.

²⁴ Asay Yesus Kirstoosi asa naa gish ooththida kiyatethafe dendidayssan coo mela xillides.

²⁵ Iza suuthan gidida ammanon nagarappe maarettana yarsho histidi Xoossi Yesusa shiishshides. Izi hessa ooththiday kasetidi poletida nagara qaxayonta dandayan aadhdhida ba xilloteth bessanasa.