ኦሮሜ 2:1-22 in Gamo

¹ ሄሳ ጊሽ ኔኖ ሃራ ቦላ ፒርዲዛይሶ ኔኒ ታ ሃኒ ጌዶን ኦꬃዲስ ጊዛ ጋሶይ ኔስ ዴና። ኔ ሃራ ኣሳ ቦላ ፒርዲዛይሳን ኔርካ ኔስ ኩናኔ ኤካሳ። ጋሶይካ ሃራ ኣሳ ቦላ ኔ ፒርዲዛይሳ ኔካ ዛራዳ ኢዛ ኦꬂዛ ጊሻሳ።

² ሃይታ ማላታ ኦꬂዛ ኣሳታ ቦላ ፆሳ ፒርዳይ ሊኬ ጊዲዳይሳ ኑ ኤሮስ።

³ ሄሳ ጊሽ ኔ ኣሳ ቦላ ፒርዳሼ ሄ ኔ ፒርዲዛይሳ ዛራ ኦꬂዛዴ ጊዲኮ ኔ ፆሳ ፒርዳፌ ኬሳ ኤካ ኣታና ኔስ ሚሳቲዜ?

⁴ ዎይኮ ፆሳ ኪያቴꬅ ኔና ማሮቴꬃኮ ካሌꬂዛይሳ ሻካ ኤሮንታ ዳሼ ኢዛ ጊታ ኪያቴꬃኔ ኢዛ ዳንዳያ ዱሬቴꬃ ኔ ሌቃይ?

⁵ ጊዶ ኣቲን ኔኒ ኔ ዎዝና ሙሜቴꬃኒኔ ማሮቴꬅ ኮዮንታ ኔ ዎዝና ጌዶን ቱማ ፆሳ ፒርዳይ ቆንጪዛ ዎዴ ፆሳ ሃንቆ ጋላሳስ ኔ ቦላ ዳሮ ሃንቆ ሺሻሳ።

⁶ ፆሲ ኢሳስ ኢሳስ ኢዛ ኦሶ ማላ ኢማና።

⁷ ሎዖ ኦሶ ኣጎንታ ኦꬂዲ ቦንቾ ሳባኔ ሜርና ዴዖ ኮዪዛይታስ ሜርና ዴዖ ኢማና።

⁸ ጊዶ ኣቲን ባርካ ባና ዶሲዛይታሲኔ ቱማ ኣጋጊዲ ኢታ ካሊዛይታ ቦላ ፒርዳይኔ ሃንቆይ ጋካና።

⁹ ኢታ ኦꬂዛ ኣይ ኣሳ ቦላ ኮይሮ ኣይሁዳ ኣሳ ቦላ ካሊዲ ኣይዛቤታ ቦላ ዋዬይኔ ሜቶይ ጋካና።

¹⁰ ጊዲኮካ ሎዖ ኦꬂዛዴስ ኦናስካ ኣይሁዳ ኣሳስ ጊዲን ኣይዛቤታስ ሳባይ፥ ሳሮቴꬂኔ ቦንቾይ ጊዳና።

¹¹ ፆሲ ኦናካ ሻኪ ማዴና።

¹² ካሴ ዎጋይ ኤቆንታ ዎዴ ናጋራ ኦꬂዳ ኣሳይ ዉሪካ ዎጋይ ባይንዳ ꬋያና፤ ዎጋይ ኤቂ ሲሚን ናጋራ ኦꬂዳይቲ ዎጋን ኦይኬቲዲ ፒርዴታና።

¹³ ኣይሲ ጊኮ ፆሳ ኣቻን ፂሎ ጌቴቲዛይቲ ኤቂዳ ዎጋስ ኣዛዜቲዛይታፔ ኣቲን ዎጋ ሲሲ ሲዪዛይታ ፃላ ጊዴቴና።

¹⁴ ዎጋይ ባይንዳ ኣይዛቤቲ ዎጋይ ዮቲዛይሳ ጮ ሜላ ሃኖቴꬃፌ ኤሪዲ ኦꬂሺን ኢስታስ ዎጋይ ባይንዳ ኣጊኮካ ኢስታስ ሜꬌቴꬃ ዎጋይ ዲዛ ጊሽ ኢስቲ ባ ኦꬃናይሳ ኤሬቴስ።

¹⁵ ኢስታ ዎዝናይ ኢስታስ ማርካቲዛ ጊሺኔ ኢስታ ቆፋይ ኢስታ ሞቲዛ ጊሽ ቃሴካ ኢስታ ማዲዛ ጊሽ ዎጋይ ዮቲዛይ ኢስታ ዎዝናን ፃፌቲዳይሳ ኤሬቴስ።

¹⁶ ሄሲካ ታ ሚሺራቾ ቃላን ታማርሲዛ ማላ ፆሲ ኣሳ ዎዝናን ቆቴቲዳይሳ ኪርስቶሳ ባጋራ ፒርዲዛ ጋላሳን ቆንጪሳና።

¹⁷ ኔ ኔና ኣይሁዳ ኣስ ጊኮ ዎጋን ኣማኔታሳኔ ኔስ ፆሳራ ዲዛ ኢሲፌቴꬃን ጬቄታሳ።

¹⁸ ዎጋ ካሊዛ ጊሽ ፆሳ ሼኔ ኤራዳ ኩሜꬅ ጊዲዛዝ ሻካ ኤሪዳ ጊዲኮ፥

¹⁹ ኔ ቆቄታ ካሌꬂዛዴ፤ ꬉማን ዲዛይታስ ፖዖ ጊዲዳይሳ ኔ ኣማኔቲዳዴ ጊዲኮ

²⁰ ዎጋፔ ኔ ዴሚዳ ኤራቴꬃኒኔ ቱማቴꬃን ሃንኮ ኤሮንታይታ ዞሪዛዴ፥ ጉꬃ ናይታ ታማርሲዛዴ ጊዲኮ

²¹ ሂስቲኮ ኔኒ ሃራታ ታማርሶ ኣጋዳ ኔ ሁዔስ ኣዛስ ታማሪኪ? ኔ ሃራ ኣሲ ካይሶቶፓ ጋ ሳባካሼ ኔስ ካይሶታይ?

²² ኔ ሃራ ኣሳይ ላይማቶንታ ማላ ዮታሼ ኔስ ላይማታይ? ኔስ ኤቃ ኢፃሳሺን ፆሳ ኬꬃ ሚሻ ቦንቃይ?

¹ Hessa gish neno hara bolla pirdizaysso neni ta hanni geedon ooththadis giza gaasoy nees deenna. Ne hara asa bolla pirdizayssan nerka nees kunane ekkaasa. Gaasoyka hara asa bolla ne pirdizayssa nekka zaarada iza ooththiza gishassa.

² Hayta malata ooththiza asata bolla Xoossa pirday likke gididayssa nu eroos.

³ Hessa gish ne asa bolla pirdashe he ne pirdizayssa zaara ooththizade gidikko ne Xoossa pirdafe kessa ekka attana nees misatizee?

⁴ Woykko Xoossa kiyateth nena maarotethakko kaalethizayssa shaaka eronta dashe iza gita kiyatethanne iza dandaya duretetha ne leqqay?

⁵ Gido attin neni ne wozna muumetethaninne maaroteth koyonta ne wozna geedon tuma Xoossa pirday qonciza wode Xoossa hanqo gallassas ne bolla daro hanqo shiishasa.

⁶ Xoossi issas issas iza ooso mala immana.

⁷ Lo7o ooso aggonta ooththidi boncho sabanne merna de7o koyizaytas merna de7o immana.

⁸ Gido attin barka bana dosizaytassinne tuma aggagidi iita kaallizayta bolla pirdaynne hanqoy gakkana.

⁹ Iita ooththiza ay asa bolla koyro Ayhuda asa bolla kaallidi Ayzaabeta bolla waayeynne metoy gakkana.

¹⁰ Gidikkoka lo7o ooththizades oonaska Ayhuda asas gidin Ayzaabetas sabay, sarotethinne bonchoy gidana.

¹¹ Xoossi oonakka shaakki maaddenna.

¹² Kase wogay eqonta wode nagara ooththida asay wurikka wogay baynda dhayana; wogay eqi simmin nagara ooththidayti wogan oyketidi pirdettana.

¹³ Ayssi giikko Xoossa achchan xillo geetettizayti eqqida wogas azazetizaytappe attin woga sisi siyizayta xalla gidetenna.

¹⁴ Wogay baynda Ayzaabeti wogay yootizayssa coo mela hanotethafe eridi ooththishin istas wogay baynda aggikkokka istas medhetetha wogay diza gish isti ba ooththanayssa ereetes.

¹⁵ Ista woznay istas markattiza gishshinne ista qofay ista mootiza gish qasseka ista maaddiza gish wogay yootizay ista woznan xaafettidayssa ereetes.

¹⁶ Hessika ta Mishiraachcho qaalan tamarsiza mala Xoossi asa woznan qotetidayssa Kirstoosa baggara pirdiza gallassan qoncisana.

¹⁷ Ne nena Ayhuda as giikko wogan ammanettasanne nees Xoossara diza issifetethan ceeqqettasa.

¹⁸ Woga kaalliza gish Xoossa shene erada kumeth gidizaz shaaka erida gidikko,

¹⁹ ne qooqeta kaaleththizade; dhuman dizaytas poo7o gididayssa ne ammanettidade gidikko

²⁰ wogappe ne demmida eratethaninne tumatethan hanko erontayta zorizade, guutha nayta tamarsizade gidikko

²¹ histikko neni harata tamarso agada ne hu7es aazas tamarikii? Ne hara asi kaysotoppa ga sabakashe nees kaysotay?

²² Ne hara asay laymatonta mala yootashe nees laymatay? Nees eeqa ixasashin Xoossa Keeththa miisha bonqay?