ኦሮሜ 1:3-28 in Gamo

³ ሚሺራቾ ቃላይካ ባ ናዛ ጊሽ ኢዚ ኣሾ ባጋራ ዳዉቴ ዜሬꬃፌ ጊዲዳይሳ ዮቲዛ ጊሻሳ።

⁴ ሄሳꬆካ ኑ ጎዳ ዬሱስ ኪርስቶሲ ባ ጌሻቴꬃ ኣያናን ሃይቆፔ ዴንዲዳይሲ ኢዚ ፆሳ ና ጊዲዳይሲ ጊታ ዎልቃን ቆንጪዴስ።

⁵ ኪርስቶሳ ሱንꬃ ጊሽ ኣማኖንታ ዴሬይ ኣማናና ማላኔ ኣዛዜታና ማላ ኢዛ ባጋራ ኑኒ ሃዋራቴꬃስ ጋꬂዛ ኪያቴꬅ ኤኪዶስ።

⁶ ኢንቴካ ዬሱስ ኪርስቶሳይታ ጊዳና ማላ ፄይጌቲዳይታራ ዴታ።

⁷ ፆሳን ዶሴቲዳይታኔ ጌሻታ ጊዳናስ ፄይጌቲዳ ኦሮሜ ቢታን ዲዛ ኢንቴስ ኡባስ ኑ ኣዋ ፆሳፌኔ ኑ ጎዳ ዬሱስ ኪርስቶሳፔ ኪያቴꬂኔ ሳሮቴꬂ ኢንቴስ ጊዶ።

⁸ ኢንቴ ኣማኖይ ኣላሜ ኩሜꬃን ሲዬቲዳ ጊሺኔ ኢንቴ ጊሽ ታ ጎዳ ፆሳ ዬሱስ ኪርስቶሳ ባጋራ ጋላታይስ።

⁹ ታ ኢንቴ ጊሽ ኡባ ዎዴ ኣይ ማላ ቆፒዛኮኔ ፆሳ ና ሚሺራቾ ሳባኮን ታ ኩሜꬃ ዎዝናፔ ኢዛስ ኦꬂዛ ፆሳይ ታስ ማርካ።

¹⁰ ታኒ ታ ዎሳን ኡባ ዎዴ ኢንቴና ቆፓይስ። ሃዒ ቃሴ ዉርሴꬃን ፆሳ ሼኔ ጊዲኮ ታ ኢንቴኮ ባና ማላ ፆሲ ታስ ኦጌ ዶያና ማላ ዎሳይስ።

¹¹ ኢንቴ ሚናና ማላ ማዲዛ ኣያና ኢሞቴꬂ ታ ኢንቴስ ጊሻናሲኔ ኢንቴና ኣይፌራ ቤያናስ ላሞታይስ።

¹² ሄሲካ ኢንቴኔ ታኒ ኢሶይ ኢሳራ ኣማኖን ሚኔታናሳ።

¹³ ታ ኢሻቶ! ሃራሶን ኣማኖንታይታ ማታን ታስ ሃኒዳ ማላ ኢንቴ ማታንካ ታስ ኦሶ ኣይፌይ ቤታና ማላ ዳሮ ዎዴ ቆፓዲስ ሺን ሃኖ ጋካናስ ታ ዲጌታዳ ዲዛይሳ ኢንቴ ኤራና ማላ ኮያይስ።

¹⁴ ታማሪዳይታስ ጊዲን ታማሮንታይታስካ፤ ኤራታሲኔ ኤያታስ ኡባስ ታ ቦላ ታማርሳና ኣጮይ ዴስ።

¹⁵ ኢንቴስ ኦሮሜን ዲዛይታሲካ ታ ሚሺራቾ ቃላ ዮታናስ ታ ኣሞቲዛይ ሄሳሳ።

¹⁶ ኣማንዛይቲ ዉሪ ኣታና ማላ ፆሳ ዎልቃ ጊዲዳ ጊሽ ታ ሚሺራቾ ቃላን ዬላቲኬ፤ ሄሲካ ኮይሮ ኣይሁዳታስ ካሊዲ ኣይዛቤታሳ።

¹⁷ “ፂሎይ ፆሳ ኣማኖን ዴስ” ጌቴቲዲ ካሴ ፃፌቲዳ ማላ ፆሳ ፂሎቴꬅ ሚሺራቾ ቃላን ቆንጪና፤ ሄ ፂሎቴꬂ ኮይሮፔ ዉርሴꬅ ጋካናስ ኣማኖን ሃናና።

¹⁸ ቱማ ባ ኢታቴꬃኒኔ ማካላን ቱጪ ኦይኪዛይታ ኢታቴꬃ ቦላኔ ኢስታ ማካላቴꬃ ኡባ ቦላ ፆሳ ሃንቆይ ሳሎፔ ቆንጫና።

¹⁹ ኢስቲ ኤራናስ ቤሲዛዚ ፆሲ ዉርሲ ኢስታስ ቆንጪሲዳ ጊሽ ኢስቲ ፆሴ ኤራናስ ቆንጬ።

²⁰ ኣላሜይ ሜꬌቶሶፔ ሃ ሲሚን ኣሳ ኣይፌን ቤቲ ኤሮንታ ፆሳ ሃኖቴꬂ ሄሲካ ኢዛስ ዲዛ ሜርና ዎልቃይኔ ፆሳቴꬃይ ኢዚ ሜꬊዳ ሜꬌቴꬃን ቆንጬን ቤቴስ። ሄሳ ጊሽ ኣሳይ ሺሻና ጋሶይ ዴና።

²¹ ኢስቲ ፆሴ ኤሪኮካ ኢዛ ፆሳቴꬃ ማላ ቦንቺቤቴናኔ ጋላቲቤቴና። ጊዶ ኣቲን ኢስታ ቆፋይ ሜላ ጎዓይ ባይንዳዚ ጊዲዴሲኔ ዩሺ ቆፖንታ ማላ ኢስታ ዎዝናይ ꬉሚዴስ።

²² ኢስቲ ባና “ኤራ” ጊዛይታ ጊዲኮካ ኤያታ ጊዲዳ።

²³ ሜርና ፆሳ ቦንቾ ሃይቂዛ ኣሳኒኔ ካፎታን፤ ሜሄታኒኔ ቢታ ቦላ ጎሼቲዛ ሜꬌቴꬃታን ሚሳቲሲዲ ላሚዳ።

²⁴ ሄሳ ጊሽ ፆሲ ኢስታ ባ ጊዶን ኢሶይ ኢሳራ ባርካ ባ ኣሳቴꬃን ቱና ኦሶ ኦꬃና ማላ ጌሻቴꬂ ባይንዳ ላይማቴꬃስ ኣꬂ ኢሚዴስ።

²⁵ ኢስቲ ፆሳ ቱማቴꬅ ዎርዶን ላሚዳ፤ ሜꬊዳ ፆሳ ኣጊዲ ሜꬌቴꬃስ ጎይኒዳኔ ኢስታስ ኦꬂዳ። ሜꬊዳ ፆሲ ኢዚ ሜርናስ ጋላቴቲዳይሳ። ኣሚን።

²⁶ ሄሳ ጌዶን ፆሲ ኢስታ ዬላቺዛ ኣሞቴꬃስ ኣꬂ ኢሚዴስ። ኢስቲ ማጫሳቲ ባናራ ዚንዓናስ ቤሶንታይታራ ዚንዓና ማላ ባና ኣꬂ ኢሚዳ።

²⁷ ሄሳꬆካ ኣቱማ ኣሳይ ባሲ ቤሲዛ ማጫሳታራ ዚንዓናስ ቤሲሺን ኣዴይ ኣዴራ ዚንዓናስ ኣሞን ፁጌቲዲ ማጫሳታራ ዚንዒዛ ማላ ኣዴይ ኣዴራ ዚንዒዲ ፓላ ሚሺ ኦꬂዳ። ሄይታንቲ ባርካ ባ ኦꬂዳ ኢታ ኦሶዛስ ቤሲዛ ቂፃቴ ባ ቦላ ኤሂዳ።

²⁸ ቃሴካ ኢስቲ ባ ቆፋራ ፆሴ ኤሮይ ኑና ማዴና ጊዳ ጊሽ ኢስቲ ኦꬃናስ ቤሶንታይሳ ኦꬃና ማላ ፆሲ ኢስታ ጎዖንታ ቆፋስ ኣꬂ ኢሚዴስ።

³ Mishiraachcho qaalaykka ba naaza gish izi asho baggara Dawute zerethafe gididayssa yootiza gishassa.

⁴ Hessathoka nu Goda Yesus Kirstoosi ba geeshshatetha Ayanan hayqoppe dendidayssi izi Xoossa naa gididayssi gita wolqan qoncides.

⁵ Kirstoosa suntha gish ammanonta derey ammanana malanne azazettana mala iza baggara nuni hawaratethas gaththiza kiyateth ekkidos.

⁶ Inteka Yesus Kirstoosayta gidana mala xeeygetidaytara deeta.

⁷ Xoossan dosettidaytanne geeshshata gidanas xeeygetida Oroome biittan diza intes ubbas nu Aawa Xoossafenne nu Goda Yesus Kirstoosappe kiyatethinne sarotethi intes gido.

⁸ Inte ammanoy alame kumeththan siyetida gishshinne inte gish ta Goda Xoossa Yesus Kirstoosa baggara galatays.

⁹ Ta inte gish ubba wode ay mala qoppizakkone Xoossa naa mishiraachcho sabakon ta kumeththa woznappe izas ooththiza Xoossay taas marka.

¹⁰ Tani ta woossan ubba wode intena qoppays. Ha7i qasse wursethan Xoossa shene gidikko ta inteko baana mala Xoossi taas oge doyana mala woossays.

¹¹ Inte minnana mala maaddiza Ayana imotethi ta intes gishanassinne intena ayfera beyanas laamotays.

¹² Hessika intenne tani issoy issara ammanon minettanassa.

¹³ Ta ishato! Harason ammanontayta matan taas hanida mala inte matanka taas ooso ayfey bettana mala daro wode qoppadis shin hanno gakkanaas ta diggettada dizayssa inte erana mala koyays.

¹⁴ Tamaridaytas gidin tamarontaytaska; eratasinne eeyatas ubbas ta bolla tamarsana accoy dees.

¹⁵ Intes Oroomen dizaytassikka ta mishiraachcho qaala yootanas ta amottizay hessassa.

¹⁶ Ammanzayti wuri attana mala Xoossa wolqa gidida gish ta mishiraachcho qaalan yeelatikke; hessikka koyro Ayhudatas kaallidi Ayzaabetassa.

¹⁷ “Xilloy Xoossa ammanon dees” geetettidi kase xaafettida mala Xoossa xilloteth mishiraachcho qaalan qoncinna; he xillotethi koyroppe wurseth gakkanaas ammanon hanana.

¹⁸ Tuma ba iitatethaninne makalan tucci oykkizayta iitatetha bollanne ista makalatetha ubba bolla Xoossa hanqoy saloppe qoncana.

¹⁹ Isti eranas bessizazi Xoossi wursi istas qoncisida gish isti Xoosse eranaas qonce.

²⁰ Alamey medhetosoppe haa simmin asa ayfen beetti eronta Xoossa hanotethi hessikka izas diza merna wolqaynne Xoossatethay izi medhdhida medhetethan qoncen beettees. Hessa gish asay shiishana gaasoy deenna.

²¹ Isti Xoosse erikkoka iza Xoossatetha mala bonchibettenanne galatibettenna. Gido attin ista qofay mela go7ay bayndazi gididessinne yuushi qopponta mala ista woznay dhumides.

²² Isti bana “Era” gizayta gidikkoka eeyata gidida.

²³ Merna Xoossa boncho hayqqiza asaninne kafotan; mehetaninne biitta bolla gooshettiza medhetethatan misatissidi laammida.

²⁴ Hessa gish Xoossi ista ba giddon issoy issara barka ba asatethan tuna ooso ooththana mala geeshshatethi baynda laymatethas aaththi immides.

²⁵ Isti Xoossa tumateth wordon laammida; medhdhida Xoossa aggidi medhetethas goynnidanne istas ooththida. Medhdhida Xoossi izi mernas galattettidayssa. Amiin.

²⁶ Hessa geedon Xoossi ista yellachiza amotethas aaththi immides. Isti macasati banara zin7anas bessontaytara zin7ana mala bana aaththi immida.

²⁷ Hessathoka attuma asay baasi bessiza macasatara zin7anas bessishin addey addera zin7anas amon xuugetidi macasatara zin7iza mala addey addera zin7idi pala miishi ooththida. Heytanti barka ba ooththida iita oosozas bessiza qixaate ba bolla ehida.

²⁸ Qasseka isti ba qofara Xoosse eroy nuna maaddenna gida gish isti ooththanas bessontayssa ooththana mala Xoossi ista go7onta qofas aaththi immides.